Jonta provinziela dl 12 de jené
USP – Te si senteda da ncuei (12 jené) à la Jonta provinziela de Bulsan udù dant la veles dl Chemun de Badia. Chëstes dëssa unì tenides danter l prim de mei y mez juni 2009. Danter i ponc de majera mpurtanza che ie unic prejentei dal presidënt Drunwalder iel nce la pruposta de lege per n aucat di jëuni, n proiet de medejina cumplementera y dis de tlausura per la Jonta provinziela.
Davia che l ambolt de Badia Ugo Dorigo à per rejons de malatia messù dé ju si ncëira, uniral chëst ann lità da nuef tl Chemun de Badia. La Jonta provinziela de Bulsan à ncuei dat pro che la veles dëssa unì tenides danter l prim de mei y 15 de juni. L di plu avisa unirà metù dal presidënt dla provinzia cun l bënstè dla region. La ncëria dl cunsëi dl Chemun de Badia nuef jirà per 6 ani nchin dl 2015 canche l unirà inò lità deberieda te duc i chemuns dla Provinzia de Bulsan. Ncuei toma nce la ncëria dl Cunsëi de Chemun de Badia.
Ancunteda dla trëi jontes dl Triol
Ai 21 de fauré se ancunterà la jontes dla Provinzia de Bulsan, dl Triol dl Nord y dl Trentin tl Ciastel Tirol sëura Maran. L argumënt zentrel dl’ancunteda sarà la scumenciadives de culaburazion danter la trëi provinzies. Domesdì iel udù dant la giaurida l Museum dedicà a Andreas Hofer a St. Leonhard de Passeier. L di dant, ai 20 de fauré uniral sëurandat la uneranzes dl Tirol a Dispruch. Danter i unerei saral chëst ann nce cater persones dl Südtirol.
Aucat di mëndri y di jëuni
La Jonta provinziela à dat pro che l dëssa unì numinà n aucat che defënd i dërc di mëndri y di jëuni. La lies di jëuni y di mëndri se damanda bele giut n tel aucat y de chësc viers iel nce stat truepa tratatives. “L ie drët che l sibe n aucat a pert che se cruzia di mëndri y di jëuni, y che lëura deberieda cun l aucat populer” à dit Drunwalder. La pruposta de lege unirà mandeda inant acioche la vënie data pro dal Cunsëi provinziel.
Proiet de medejina cumplementera
Per l tëmp de doi ani uniral pità nce n servisc de medejina cumplementera. Tl spedel de Maran uniral njenià ite na stazion cun 11 persones spezialisedes y doi scrivanes (plu na persona a mez tëmp a puzené) che pieta servijes sciche per ejëmpl la homeopatia o akupunktura, terapia a man, oteopatia o metodologies dla medejina cumplemetera. “La medejina cumplementera ne ie nia bënududa da duc, ma ulon ti pité tramedoi pusciblteies a nosta populazion” à sorissà Drunwalder. La rezetes puderà me unì scrites ora da dutores spezialisei te spedel y pona plu inant nce dai dutores de cësa. Tl daunì iel nce udù dant de nsenië ju persones per stazions ti autri spedei. L 70% dl custimënt dëssa unì curì tres l ticket di pazienc. Me per la categuries de davani plu bas sarà l servisc de medejina cumplementera debant.
Jonta ai 27 de jené n tlausura
Di programs de aministrazion per l ann 2009 se traterala ai 27 de jené canche la Jonta provinziela tenirà n’ancunteda n tlausura. Te chësta ucajion meterà i assessëures provinziei ju la diretives per la prupostes de lege, i pruvedimënc per judé l’economia y co smëndri la burocrazia tla Provinzia de Bulsan. La tlausura sarà nce ucajion per rujené dl bilanz provinziel 2009.
USP
