Dala Jonta provinziela dl 19 de jené
USP - L bilanz provinziel 2009 ie stat l argumënt zentrel dla segonda senteda dla Jonta provinziela de jené. L presidënt Luis Durnwalder à prejentà n valgun ponc de majer nteres.
N cont dla manifestazion de prutesta metuda a jì dala Lega n sada passeda contra l fé na moscea a Bulsan, se à la Jonta Provinziela ncuei detlarà de contra. I assessëures sustën la minonga che la religion fej pert dla cultura y l ne ie nia drët strumentalisé cuestions de religion per fins politics. L presidënt Drunwalder à sorissà che l ne ie nia debujën de fé su moscées a Bulsan, nce sce l ie drët che i zitadins fulestieres possa ti jì do a si religion. Per chësta rejon iel tla cëses anjeniedes dala Provinzia per i imigrei, nce unì udù dant locai che possa unì adurvei per la preghiera. Chësc ie n cuntribut per la pesc y la bona cunvivënza.
Bilanz 2009
La Jonta provinziela à scumencià la tratatives per l bilanz 2009. La soma sarà bonamënter n fregul majera permez al 2008, cun 5,375 miliardes de Euro. La dumandes di assessorac ruva sun na soma de 5,7 miliardes. Ponc che ie bele segures tl bilanz ie n capitul de 40-50 milion de Euro per l soziel y la familia y 50 milion per l fond de rotazion per finanzië lëures publics di chemuns y dla provinzia cun l fin de no messé fé debic. La Jonta provinziela mesessa dé pro l documënt nchin ai 9 de fauré per l dé inant ala cumiscion legislativa dl Cunsëi provinziel. Te Cunsëi nstës unirà l bilanz bonamënter tratà danter la fin de merz y l 3 de auril.
Cëses de lecod ai tumei
Pra la cëses de lecord ai tumei dla viera a San Ciana/Innichen sun l Brënner y sun la Malser Heide uniral metù su tofles de spiegazion te cater rujenedes. Dlongia l tudësch, talian y nglëisc unirà la tofles nce anjeniedes per ladin.
usp
