Fiera per scola y mestier gëura ai 12 de fauré
USP – Cun 13 y 14 ani muessa i jëuni tò na dezijion mpurtanta: la se trata de crì ora la streda che porta ala furmazion plu adateda. Ciuna scola auta o ciuna scola prufesciunela. La fiera dla scoles y di mestieres dai 12 ai 14 de fauré tla Stadthalle a Bulsan juda sculeies y genitores cun nfurmazions de utl.
La fiera dla scoles autes y di mestieres ie dai ani n pont de referimënt mpurtant per abiné na direzion de cie vies jì inant do la scola mesana. Sculeies possa tlo se fé cheder n cont dla pruspetives che pieta la scoles autes y la scoles prufesciuneles.
Chëst ann vën la fiera tenida tla Stadthalle tla streda Reschen a Bulsan. Tlo fej pea ntëur 30 scoles autes y scoles prufesciuneles, l Ufize provinziel per la Furmazion y la Cunsulënza prufesciunela, l ntendënza scolastica, l Istitut Pedagogich, la berstot davierta MANU y l servisc autonom dla firmes de pratiga.
N juebia, 12 de fauré unirà la fiera dla scoles autes y di mestieres giaurida dala 10 danmesdì dal assessëur Hans Berger y l ntendënt ala scoles tudësces Peter Höllrigl.
La tlasses de scola possa vijité la fiera i prim doi dis (juebia y vënderdi) dala 8.30 nchin la 12.30. N sada ie la fiera davierta dut l di, dala 8.30 ala 16.00 per sculeies, genitores y nteressei. La coordinazion dla fiera ie tla mans dla ispetëura Erica Fassa, (tel. 0471 417620/21) y la diretëura Barbara Willimek (tel. 0471 562800).
as
