Jonta provinziela dl 9 de fauré
USP – La jonta provinziela à ncuei (lunesc 9 fauré) finà via la tratatives n cont dl bilanz provinziel. Per l ann 2009 à l aministrazion 5.424 milion de Euro a desposizion. Chësc ie stat l pront prinzipel che l presidënt la provinzia prejentà ncuei do la senteda a Bulsan.
Permez al ann passà ie l bilanz provinziel chëst ann cresciù de 110 milion de Euro. La Jonta provinziela à ncuei spartì su i 5.424 milion de Euro su 32 capituli. L bilanz provinziel deberieda cun la lege finanziera unirà pona purtà dant te Cunsëi provinziel per l bënsté. L majer capitul udù dant dala Jonta reverda la sanità per chëla che n à destinà 1.275 milion de Euro che fej ora belau n chert de dut l bilanz. Permez al ann passà iel unì aumentà chësc capitul de 120 milion. Per la furmazion y scola iel unì udù dant 646 milion de Euro (53,5 milions de plu che tl 2008), per l aministrazion provinziela an adatà i paiamënc ai cuntrac coletives a na maniera de ruvé sun 611 milion de Euro (mpede 572 tl 2008). N gran capitul reverda nce l finanziamënt di chemuns, tlo ann udù dant 562 milion de Euro (55 milion de plu permez al ann passà). I lëures publics (frabiches y stredes) possa chëst an unì a custé nchin 300 milion de Euro che ie feter la medema soma sciche la ann passà. (duta la lista ei junteda pea)
Lege finanziera
La Jonta provinziela à ti si senteda dl 9 de fauré me plu muda doi di ndut 61 capituli. Per la plaza de garejeda di ciavei a Maran fejen cont de paië deberieda cun l chemun 15 milion de Euro, 10 milion ie unic mpermetui dal Ministèr a Roma. Per sparanië y per scemplifiché la pruzedures vën la gestion di museums provinziei ntegreda tl Assessorat per scola y cultura mantenian purempò na cërta autonomia. L’aministrazion da śën mantën la gestion mo nchin ala fin de chëst ann.
Cunvëni de Alpinism
D’autonn uniral metù a jì a Persenon n cunvëni nternaziunel de alpinism cun i miëur alpinisć dl mond. La coordinazion dl cunvëni dal titul “International Mountain Summit” ti ie unida sëurandata al alpinist Reinhold Messner. “Te Südtirol ons jënt de gran cumpetënza alpinistica y ulon vester n pue’ da zënter per cuestions alpinistiches nce a livel nternaziunel” à sorissà l presidënt Drunwalder.
Defendura dla cuntreda
Roland Dellagiacoma ie unì numinà presidënt dla prima Cumiscion per la defendura dla cuntreda L dut. Dellagiacoma ie diretëur dla repartizion provinziela per natura y cuntreda y fova bele dant presidënt dla cumiscion. La Jonta provinziela à numinà Virna Bussadori vizepresidënta. I autri cumëmbri dla cumiscion ie Emilo Dellagiacoma, Konrad Stockner, Hansjörg Haller, Leo Unterholzner, Georg Mayr y Kurt Kusstatscher. La cumpetënza prinzipela dla prima cumiscion ie de valuté proiec n cont dl passené tla cuntreda y l plan provinziel dla cuntreda.
Cumité per la comunicazion
A cë dla cumiscion provinziela per la comunicazion ti à la Jonta inò dat la crëta a Hansjörg Kucera. Viepresidënt dla cumiscion ie Ezio Zermiani. Chësc cumité à la cumpetënza de cialé do che vënie respeteda la par-conditio y de cialé do che i media debe inant nfurmazions rëidla.
Cumité per frabiché cuatieres
L assessëur nuef Christian Tommasini ie unì numinà presidënt dl cumité provinziel per fabriché cuatieres. Vizepresidënt ie Luis Drunwalder.
Monumënc fascisć
Do la marcia de prutesta di Scizeri contra l monumënt dl Alpino a Burnech à nce la Jonta provinziela tëut posizion. L presidënt Drunwalder se damanda na descuscion cuncreta y na spiegazion ala populazion de cie che ie realtà storica. “Monumënc fascisć ne toca nia plu te nosc tëmps y dëssa, tant che l ie puscibl, unì tëuc demez.” à dit Drunwalder. Tl cajo dl palaz dla finanza a Bulsan dëssel unì tëut ju i urnamënc y metui te n museum. Mpede l monumënt dl Alpino a Burnech dëssel unì scrit ora n cuncors per n monumënt al gran lëur di alpini te na caserma. “Ulon che i jëuni che vën do giape la nfurmazion cie che ie veramënter sta tla storia. Nsci sciche fajeron cun i monumënc ai tumei dla viera sun la sëides de stat, ulache l ie nce suplì saudeies da demez che à dunfrì si vita per defënder la sëides. “Ne ulon a deguna maniera jì contra la populazion de rujeneda taliana ma ne pudon nce no azeté la pruvocazions fascistes. Nce la marcia de prutesta di scizeri ne ie nia la drëta. La va de abiné deberieda dla drëta soluzion” nsci l presidënt Durnwalder.
as
