Università y studi per Ladins: Mussner anconta la consula dl’Austria
USP – La mendranza ladina y l pudëi jì al universiteies dl’Austria ie stat argumënt zentrel dl ancunteda dl assessëur Florian Mussner cun la consula generela dl’Austria a Milan, Theresa Indjein Untersteiner. Tl’ancunteda stata chëst ena a Bulsan ie nce unì rujenà de recunëscer i tituli de studi, la situazion economica y i pruvedimënc dla Jonta provinziela n cont dla crisa economica.
Tl’ancunteda cun l assessëur Mussner à l diretëur de repartizion tl Minister dl’Austria Georg Stilfried cumpanià la consula generela. “On na bona culaburazion cun l consulat dl’Austria a Milan, dantaprima sce l se trata de defënder y sustenì la mendranza ladina” dij Mussner.
N pont zentrel ie daniëura la furmazion. “Per nëus Ladins iel de mpurtanza fundamentela che l nes vën dat la puscibltà de studië tl universiteies dl’Austria, dantaldut a Dispruch” nsci ti à Mussner metù a cuer ala consula generela. “Nce per la mendranza ladina muessa valëi i medemi dërc sciche per i studënc dl’Austria, chësc me per avëi la puscibltà de giapé n post de studi” spiega l assessëur ladin.
Cun Indjein Untersteiner y Stilfried iel nce unì rujenà de recunëscer i tituli de studi. „Iust ajache la scoles autes se adatea for inò ai tëmps, iel mpurtant tenì l var cun l mudé dla notes y l recunëscer di tituli” dij l assessëur che sorissea nce che l recunëscer di tituli ne ie nia me minà l diplom de laurea. Per sustenì l barat sëura la sëides de stat ora iel nce de utl che l vënie recunesciù zënza dificulteies furmazions scolastiches y de pratica.
Tl’ancunteda cun la consula generela iel nce unì tratà la situazion economica te chëla che Mussner à prejentà i pruvedimënc udui dant tlo da nëus per sustenì l’economia te chësc tëmp de crisa. “Cun nvestizions ulons miuré la la situazion per la firmes y a chësta maniera seguré i posć de lëur. Mplu a nvestizions nce conseguenzes positives per l svilup dla Provinzia” dij Mussner.
as
