Ntreda tla Val Badia y tunel: reunion di zitadins ai 25 de fauré
USP – La ntrenda nueva per la Val Badia y l tunel sota Ciastelbadia ie i argumënc zentrei dl’ancunteda di zitadins n mierculdi 25 de fauré a S.Laurënz. L assessëur ala stredes Florian Mussnet prejenterà y respunderà a dumandes n cont i doi proiec ndependënc.
“L nes ie mpurtant che l vënie nce rujenà publicamënter di lëures dla Provinzia y che i zitadins posse se fé na minonga sun i proiec” dij Mussner. La basa de dut chësc dëssa vester na nfurmazion ogetiva. “La reunion di zitadins ie n var per purté chësta nfrumazion danter la jënt” spiega l assessëur che prejenterà i proiec y la varianta per pudëi furné tla Val Badia.
L ie de plu argumënc che sustën la varianta “Klosterwald”. N cont dl muvimënt di auti iela te na bona posizion, tenian cont che ntan l’ena ie belau trëi iedesc mo n tan de auti che furnea de viers de Burnech, permez a chëi che furnea de vieres de Persenon. “Sce l unissa fat l ntreda dla Val Badia tl raion “Tobl”, messessa la gran pert di auti fé na gran raida” spiega l assessëur. Mplù ne ie la varaianta “Tobl” nce nia adateda dal pont de ududa tecnich y de cialé ora: n puent drët loch y rampes da ruvé permez cun de gran mures de sustëni per via dl rone ërt y na gran ncrujeda.
La varianta “Klosterwald” ie unida svilupeda cun i esperc dla Cumiscion per l mpat ambientel y dl Ufize per monumëc a una. La ntreda nueva dal Val Badia dëssa unì realiseda danter l Kniepass y Ciastelbadia, a chësta maniera unissa stravardei tramedoi ensambles.
“Sëuraprò ie l puent feter nia da udëi, chëi che vën da Persenon l vëij permò canche i ruva daujin al ncrëusc” dij Mussner. Dal col de Ciastelbadia saral me da udëi l puent y nia l ncrëusc. Da pert dl “Klosterwald” vën l puent curì dal bosch.
Pra l’ancunteda di zitadins cun l assessëur Florian Mussner n mierculdi 25 de fauré dala 20.00 tla Cësa dla Lies a S.Laurënz puderà uni un se fé n cheder dla ntreda nueva per la Val Badia y di lëures per l tunel sota Ciastelbadia.
as
