Streda de Sarentin: Mussner se fej n cheder di lëures (cun audio)
USP – I lëures pra la streda dla Val Sarentin che fova unic fermei d’autonn va sën inò inant. “Per garantì segurëza ne jons nia plu inant a furé i tuniei, ma l unirà stlupetà” spiega la assessëur ala stredes Florian Mussner, che ncuei (3 de merz) ie stat sun l post per se fé n cheder di lëures.
La streda nueva per jì tla val Sarentin giapa doi tuniei. L prim, de 1,5 chilometri, muev dal ciastel Runkelstein. Dedite iel pona 200 metri de streda dan che scumëncia l segondo tunel nuef che ie 2 chilometri lonch. “Cun chisc doi tuniei ne astilons nia me ora i 15 vedli tuniei, ma giapon na streda plu segura per la Val Sarentin” spiega Mussner.
D’autonn an abù dificulteies a furé l busc pilot dl prim tunel. “For inò iel unì ju sac dal plafonn, nchin che l n à fermà i lëures per l pericul” spiega l assessëur ala cultura. Per chësta rejon uniral śën nce jit inant cun l sistem tlassich de stlupeté.
L vën fat cont de finé l busc pilot dl prim tunel nchin de nuvëmber y pona puderan scumencé al slargë ora ala mesura che n se adrova. Chësc lëur durerà trëi ani. „Tl medemo tëmp uniral nce jit inant cun l segondo tunel, a na maniera che pudon fé cont che tramedoi possa unì finei nchin tl 2012” spiega Mussner. De ndut vëniel spendù ite 46,5 milion de Euro tla streda nueva dla Val Sarentin.
Na soluzion an nce abinà n cont de co adurvé l material che vën giavà ora – l se trata de feter 340.000 metri cubich. “Majera pert dl material giavà ora unirà adurvà per fé la fundamënta dla streda danter i doi tuniei” nsci l assessëur ala stredes.
as
