Cë dla fiera dal assessëur Widmann
USP – L presidënt y l diretëur dla Fiera de Bulsan se à inier (3 de merz) ancuntà cun l assessëur Thomas Widmann che à sëurantëut la cumpetënzes de cumerz, artejanat y ndustria, y ie nsci l assessëur de referimënt per la fiera. “La fiera ie na vedrina mpurtanta per l’economia, iust te chisc tëmps nia saurì” à dit Widmann.
“Iust te tëmps te chëi che l ne vën nia vendù truep iel mpurtant che la mprejes dl Südtirol giape la puscibltà de prejenté si prudoc sun la fiera de cësa y tl medem tëmp mëter a jì cuntac cun firmes da oradecà” nsci Widmann do l’ancunteda cun l presidënt y diretëur dla fiera Gernot Rössler y Reinhold Marsoner. La defrënta fieres à purtà Südtirol te na bona posizion nternaziunela. Les ie na luegia ulache l vën mustrà su l savëi da nosta jënt sciche per ejëmpl la tecnica per la montes che à n gran inuem nternaziunel.
De mpurtanza iel nce la gran fieres per l publich. “Chësta fieres ie deventedes tradizion y les à te chësc rie mumënt per l’economia n gran valor ajache les pieta ucajion de analisé y paredlé prudoc che vën nsci nce vendui plu saurì” dij l assessëur provinziel. I reprejentanc dla fiera à tl’ancunteda nce purtà dant co che n ulëssa mëter a jì l calënder tl daunì.
as
