Assessëures Widmann y Mussner n cont dla nfurmazions de mubilità
USP – I Istitut de statistica Astat à ncuei (4 merz) dat ora na publicazion cun na lingia de dac y ndicazions sun l muvimënt sun streda tl Südtirol (cëla comunicat a pert). La nfurmazions reverda l ann 2007 y ie n cont dl trasport publich l’a nfurmazions plu realistiches dan la ntroduzion dl abunamënt debant.
“N cheder generel di tanc che se nuzea dl trasport ie daniëura me n pert stat realistich davia che la nfurmazions univa da de plu pertes y ne curiva nia duta la vela” nsci l assessëur ala mubilità Thomas Widmann. Dal autonn 2008 ne iel nia plu mesun avëi nfurmazions tleres davia che feter 135.000 persones à giapà l abunamënt debant che ne muessa nia vester timbrà. La medema cossa vel nce per i feter 15.000 abunamënc a miëur priesc. “Jënt de tëmp y sculeies ne vën nia plu cumpedei dala statistica” dij Widmann. N sa chi che à giapà n abunamënt, ma n ne sà nia tan de viages che l ie unì fat.
Proves a cajo desmostra purempò che la cumpëida de chëi che adrova i mesuns publics ie cresciuda dassënn. “Son ruvei tan inant che n pert ie i mesuns sëuraciariei, dantaldut ti orars de majer muvimënt” spiega l assessëur. Chësc scebën che i ani passei iel unì miurà dassënn l servisc de curieres y ferates.
“Dlonch ulache l ie unì miurà l servisc an nce abù scialdi de plu persones che l adrova. Chësc vel ti 12 chemuns che à l Citybus, ulache l servisc pieta l trasport uni ëura o uni mes’ ëura y pra l servisc de sada y dumënia” dij Widmann.
L assessëur Florian Mussner vëij la statistica dl Astat de bon uedl. “La nfurmazions nes ie de gran mpurtanza tla proietazion dla stredes. Dantaprima te chëla lueges ulache crësc la cumpëida possen cun nfrastrutures aldò miuré la segurëza sun streda. Tenion nce cont de chëi che vif dlongia la stredes de gran muvimënt. “Sce l muvimënt arjonj n livel aut, iel nosc duvier de abiné alternatives sciche stredes de zircunvalazion che ti dà inò plu cualità de vita ti zëntri” dij Mussner.
as
