Tosc la ratificazion dla Cunvenzion dl’Elpes
USP – N var de gran mpurtanza che fova bele giut debujën vëija l presidënt dla provinzia Durnwalder la dezijion dl Guviern a Roma de purté inant la ratificazion di protocoi dla Cunvenzion dl’Elpes. “Drucon bele giut de chësc viers ajache l protocol n cont dl muvimënt sun streda ie de gran mpurtanza per l Südtirol sciche raion de transit” dij Durnwalder.
L Cunsëi di Ministri a Roma à n vënderdi dat pro la ratificazion di protocoi dla Cunvenzion dl’Elpes la dajan inant al Parlamënt. “La ratificazion ne ie mo nia stluta ju, ma l prim var ie bele fat” dij Durnwalder che se ova damandà la ratificazion feter uni iede che l ie jit a Roma. “Zënza la ratificazion di protocoi nueves resta i fins dla Cunvenzion dl’Elpes me n generel”.
I paejes dla Cunvenzion dl’Elpes à laurà ora nuef protocoi de atuazion. “Tlo iel unì fat ora la strategies deberieda ti ciamps plu mpurtanc per na politica che dura cun l fin de mantenì y svilupé nosc raion de vita” spiega l presidënt dla Provinzia. L ie unì fat protocoi ti ciamps dl ambient y cuntreda, lëur da paur tla montes, muvimënt sun streda, bosc, urbanistica, turism, energia y la defendura dl fonz.
“L protocol de majera mpurtanza per l Südtirol ie chël n cont dl muvimënt sun streda. Te chësc iel danterauter nce udù dant che l ne possa nia unì fat stredes nueves per traversé l’Elpes y che l vën tëut pruvedimënc per smendrì l mpaziamënt dl’aria” dij Durnwalder. Ël fej nce referimënt ala mpurtanza che la ferata y si miuramënt à giapà tl protocol. “I pruvedimënc fai ora ti protocoi ne ie nia me na vijion, ma i muessa unì realisei” sorissea l presidënt.
as
