Frabiches: 96 percënt dla ncëries a firmes da tlo
USP – L Ufize provinziel per apalc mostra su na statistica de marueia: tl ann 2008 ie passa 96% di apalc jic a firmes da tlo. N cont di custimënc ie l 86 percënt restà tl Südtirol. “La zifres mostra che son sun la drëta streda” dij l assessëur Florian Mussner.
“Dai ani cialons de tré ite firmes da tlo ti lëures publics respetan sambën duc i regulamënc”, dij Mussner. Chësc ie nce unì arjont aldò dla testemunianza dl Ufize provinziel per apalc. Ntan l’ultimo ann à la Provinzia de Bulsan sëurandat apalc per n custimënt de 238 milion de Euro, ntëur l 86 percënt ti ie jic a firmes dl Südtirol.
“Chësta perzentuela ie drët auta sce n pënsa che pra de majeri lëures se à pità firmes da tlo y da oradecà deberieda” dij l assessëur. Chësc vel per l majer lëur dl 2008, l fé su dl mplant per l refudam (81 milion de Euro) nce sciche pra l segondo majer lëur, l tunel a Leifers (32,7 milion de Euro).
Mo plu mprescion fej la pert dla firmes de construzion da tlo cunscidran la cumpëida di apalc. L ie avisa 96,74 percënt di apalc che ie unic sëurandai a firmes da tlo.
“Cialon de lauré cun firmes da tlo ajache da una pert sustenions nscila la multiplicazion dl valor tlo da nëus” spiega l assessëur ai lëures publics Mussner. Chësc sarà ti proscimi mënsc mo de majera mpurtanza canche la va de cumbater la crisa economica. “Cialon perchël de ngrandì mo de plu la pert per la firmes da tlo” dij Mussner. Tl medemo mumënt ie i apalc a firmes da tlo nce na nvestizion tla cualità. “Chësc va te n tëmp plu lonch a bën de duc” spiega l assessëur.
as
