Ispetëura nueva per la scoles ladines
USP – Rosmarie Crazzolara da S.Ciascian ie unida numineda ispetëura nueva dla Scoles ladines. La nomina da pert dl ntendënt Roland Verra vëija dant chësta ncëria cun scumenciamënt de setëmber 2009.
![](/news/img/lazy.gif)
Rosmarie Crazzolara ie dirijënta dla Direzion Raionela dla scoles elementeres y mesanes de Al Plan de Mareo che tol ite dut l raion dla bassa Badia y de Mareo. Ëila à de bona esperienzes y qualifiches prufescioneles per la ncëria de gran respunsabltà da ispetëura. Do vester stata 5 ani nsenianta tla scola elementera y 5 ani tla scola mesana se à Rosmarie Crazzolara cruzià per 16 ani dla direzion didattica a Badia. La ncëria da Ispetëura sëurantol Crazzolara do avëi menà per 8 ani la direzion raionela de Al Plan de Mareo.
L lëur dla Ispetëura ie chël de cunsië y sustenì la scoles autonomes di luesc ladins, de ti sté do ala inuvazions pedagogiches y legislatives, de nrescì problematiches che possa unì a sel dé via per l ann de scola. Mplu iel nce si cumpetënza de cialé do al bon funziunamënt dla lezions y di ejams, de lauré ora materiai de scola. Per l bon nseniamënt tla scoles ladines iel nce mpëni dl’ispetëura de judé pea tla furmazion y tl ajurnamënt dl personal nseniant y diretif y generalmënter de ti judé ala Ntendënza Ladina a pité l miëur servisc per nosc model educatif. “Cun chësc pruvedimënt dëssel unì putenzià l mpëni pedagogich y didatich per nosc model scolastich che vën cunfrunta for deplù cun debujëns nueves, purtei dala reformes scolastiches y dala mudazions tla chemunanza de aldidancuei“ sorissea l ntendënt Roland Verra.
as