Sensibilisazion ladina pra l Teater comunel de Bulsan
USP – Sun la cësa dl Teater comunel de Bulsan iel chisc dis unì metù su la scrita cun l inuem nce per ladin. “Chësc ie n var per sensibilisé la populazion de duta la Provinzia n cont de nosta mendranza” se ncunforta l assessëur provinziel Florian Mussner.
Ala scrites per tudësch y talian vëniel juntà “Teater comunel”. L Assessorat ladin dla Provinzia de Bulsan ova bele damandà dan n ann che l vënie nce juntà l inuem ladin sun chësta strutura publica che à truep vijitadëures. L’aministrazions dl Teater y dl Chemun de Bulsan ie states a una a cundizion che la Provinzia purtëssa l custimënt. Chisc dis (11 merz) iel unì spustà la scrites tl’autra rujenedes y juntà la scrita cun luminazion interna per ladin. Cossa che tol plu lëur che n pudëssa miné ajache l ie nce debujën de tò ju la plates y spusté l mplant de luminazion.
“N var al iede vëniel a chësta maniera fat sensibilisazion per la rujeneda ladina” dij Mussner. L Teater comunel a Bulsan ie una dla strutures publiches de gran mpurtanza, tlo vëniel adalerch truep vijitadëures al ann. “Per i zitadins tudësc y taliani testemunieia la scrita per ladin nosta grupa de rujeneda, per i vijitadëures ladins iel n sëni de azetanza” nsci l assessëur ladin.
De agost iel a Bulsan unì dedicà na streda a Haslach a San Ujep Freinademetz, nce chësc ie stat n sëni de viers dla mendranza ladina. La Provinzia nstëssa fej pra i lëures publics la tofles de nfurmazion te duta trëi rujenedes. Cun l aiut dl Istitut Culturel Ladin vëniel svilupà esprescions nueves per pudëi prejenté miec manieres modernes de frabiché.
as
