Durnwalder y Mussner gëura la prima pert dla zircunvalazion de Auer (cun audio)
USP – La prima pert dla zircunvalazion de Auer i ncuei (11 merz) unida giaurida dal presidënt dla Provinzia Luis Drunwalder y dal assessëur Florian Mussner. Ncuei iel nce unì scumencià na pert mpurtanta per l segondo toch dla streda, cun l prim stlupeté a metù man i lëures per l tunel St.Daniel.
La zircunvalazion de Auer ie la soluzion de n problem zentrel per chësc raion. “Auer muessa supurté l muvimënt de transit da de plu pertes, da nord a sud, chëi che furnea tla val de Flëm y nce de viers de Tramin” spiega l Presidënt dla Provinzia. Per chëi che furnea a Tramin porta l prim toch, che ie śën daviert, la soluzion. “L rundel juda a spartì l muvimënt che va de viers de Auer y tla val de Flëm, l tunel de feter un chilometer sota Castelfeder avisa ora l muvimënt che va de viers dl’autostreda y de vies de Flëm” spiega Florian Mussner. Tlo unirà mo leprò n segondo tunel de 150 metri.
Al problem dl muvimënt da nord a sud uelen ti jì ncontra cun l tunel de 1,1 chilometri che i unì scumencià ncuei. “L tunel St. Daniel ie l slungiamënt dla zircunvalazion nchin tl raion de produzion de Auer, che fej astilé ora l luech” spiega l assessëur ala stredes.
La segonda pert dla streda nueva dëssa unì finà nchin tl 2013. Nchin ntlëuta iel udù dant n custimënt de feter 71 milion de Euro per la zircunvalazion de Auer: 39 milion de Euro per l prim toch che ie śën daviert y 32 milion de Euro per l segondo toch.
as
