Mussner anconta l’Union di ladins da Fodom
USP- L assessëur Florian Mussner se à inier (11 merz) ancuntà cun la presidënta nueva dla Union di Ladins de Fodom y l presidënt dl Istitut culturel ladin Cesa de Jan. Tl’ancunteda a Bulsan iel da tramedoi pertes unì detlarà de ulëi jì inant y nchinamei slargë ora la culaburazion culturela ladina.
Daniela Templari, presidënta nueva dla Union di Ladins de Fodom à rengrazià l assessëur ladin per la bona culaburazion tl ciamp culturel ntan i ultimi mënsc. Nanni Pellegrini à sciche presidënt dl Istitut culturel ladin a Còl Santa Lizia, dantaldut laudà i cuntac y la culaburazion danter istituc culturei. Ultimamënter iel unì metù a jì culaburazions cun lies de ca da mont. Nsci à per ejëmpl la Mujiga de Corvara, che ie geograficamënter plu daujin a Fodom, nce pità furmazion musichela ai jëuni de vif danter Reba y Còl. Cun l barat de n reprejentant fodom y badiot ti Istituc culturei a S.Martin y a Còl an bele nvià via na culaburazion per mëter a jì sinergies danter istituc.
“Te Fodom vëniel laurà cun gran idealism per la cultura y l ie drët judé chësc gran mpëni per l ladin” dij l assessëur Florian Mussner. Tl ancunteda de inier a Bulsan, te chëla che fova nce l diretëur de repartizion Alexander Prinoth y Alexander Piccolruaz dl Ufize per la cultura ladina, iel unì detlarà de ulëi slargë ora la culaburazion cun Fodom. Dantaldut a livel de materiel didatich ulëssen che l Istitut pedagogich ladin mëte a desposizion si savëi y si esperienza tecnica per na culaburazion tl ciamp dla furmazion. N var de chësc vieres iel bele unì fat danter la Unions di Ladins de Badia y Fodom che à dat ora deberieda l liber dal titul “Doi ciacole nte stua”.
as
