Federalism fischel zënza cunvergënza, judé a sparanië
USP – L bilanz dla regions autonomes puderà nce tl daunì unì menà zënza se tenì ai criteries de cunvergënza. La regions messerà judé a sparanië aldò di fins metui dant dal Stat. Chësc ie uni ora dala tratatives n cont dl federalism fischel di presidënc dla regions autonomes ncuei (16 merz) cun l minister Roberto Calderoli y Raffaele Fitto a Roma.
Passa doi ëura y mesa à l Presidënt dla provinzia Drunwalder y si cumpanies presidënc dl’autra regions autonomes tratà cun l minister talian per la regions Fitto y l minister per la scëmplificazion dla normes Calderoli tla Camera a Montecitorio. La se à tratà dla mudazions dla pruposta de lege de federalism fischel.
Tla tratatives iel dantaprima unì rujenà dl articul 25 che vëija dant che duta la regions ie tachedes a criteries de cunvergënza per dé ora scioldi. “Cun chisc criteries nfascëssel indiretamënter na cumpetënza de coordinazion per l Stat, contra chëla che on bele messé se paré n iede cun forza ajache la taiessa dassënn nosta cumpetënzes” à dit Drunwalder. Chësta vijion à ncuei abù la sëuravënta. “La pert che udova dant i criteries ie unida canceleda y nsci muessa nosc bilanz me se tenì al pat de stabilità” spiega l Presidënt dla Provinzia cun sudesfazion. “L ie n resultat dassënn positif”.
Ncuei iesen ruvei a una che nce la regions autonomes tenirà pea per arjonjer i fins de sparani dl Stat. “Chësc unirà a se l dé te chëla de paië ite tl Fond de solidarietà o te chëla che l vën sëurantëut cumpetënzes nueves” dij Drunwalder. Co y te ce mesura che uni region juda a sparanië unirà fat ora te tratatives singules y nia coche udù dant dal Stat, pra na mëisa cun l Guviern de Roma y la regions. “Cun chësta regulamentazion ne uniral nia fat mudazions ala normatives me da una pert” dij Drunwalder. Plu che auter saral na grupa de lëur cun reprejentanc dla Provinzia y di Ministeres che laurerà ora co che l vën metù n drova l federalism fischel y i pruvedimënc per sparanië. Chisc unirà pona purtei inant tré na norma de atuazion.
as
