Kanzler y Durnwalder n cont dl Tunel de Basa y la Cunvenzion dl’Elpes
USP – L miuramënt dla ferata dl Prëner y l finanziamënt aldò ie ncuei stai zënter dl’ancunteda danter l Presidënt dla Provinzia Luis Drunwalder y l Kanzler austriach Werner Faymann, ncuei (17 merz) a Viena. Sëuraprò iel nce unì rujenà dl svilup te Südtirol, la Cunvenzion dl’Elpes y la recunescënza di tituli de studi.
L Kanzler Faymann à do l’ancunteda trat la cuntlujion: „Lauron bele giut per l miuramënt dla ferata dl Prëner, la nes dajerà mo giut da lëur y nes fajerà ruvé mo plu daujin”. L Proiet ie śën nvià via. “L’Austria à per fertuna sëurantëut na posizion diretiva y à bele metù man la tratatives per l finanziamënt cun la Talia” jonta l presidënt dla Provinzia che vëija tl Tunel de Basa la pert prinzipela dl cunliamënt Nord-Sud danter Stockholm y Palermo.
Ncuei se ala nce tratà dl nteres da tramedoi pertes per la Cunvenzion dl’Elpes. “Chësc ie bele n argumënt per nëus ajache la sënta ie a Dispruch y na filiela a Bulsan” dij Drunwalder. Deberieda ulons purté inant la Cunvenzion dl’Elpes. N var mpurtan ie da permò sta canche l Guviern Talian à nvià via la ratificazion di protocoi dla Cunvenzion.
A Viena ie nce la recunescënza de tituli de studi stai argumënt. “Ulon che l sibe nce tl daunì truep jëuni dl Südtirol che studieia tl’Austria, perchël muessen cialé che i tituli de studi vënie nce recunesciui tla Talia” dij l Presidënt dla Provinzia. La reforma di studi à cumplicà la cuestion, truepa pertes muessa unì tratedes da nuef danter la Talia y l’Austria.
L Kanzler Faymann à do l’ancunteda nce lecurdà l senificat economich di raporc danter Südtirol y l’Austria. “L’esportazion de vieres de Südtirol arjonj 1,1 miliardes de Euro. Chësc ie de plu de chël che vën vendù tl Japan” à dit Faymann. Durnwalder à laudà l’aculienza da plajëi de co che l ie unì tëut su ncuei a Viena. “Zënza riferimënt ala posizion politica y a chi che à iust la ncëria da kanzler, sons daniëura unic tëuc su te drët n bon tlima y duc i guvierns à mustrà gran ulentà de culaburazion” nsci l presidënt dla Provinzia.
as
