Per l Tunel dl Prëner: Durnwalder anconta Pröll
USP – L Vizekanzler dl’Austria Josef Pröll ie ncuei (17 merz) stat tlermënter a una per l Tunel dl Prëner canche l à ancuntà l presidënt dla Provinzia Durnwalder a Viena. L ie nce unì rujenà dl recunescimënt di tituli de studi y dl bujën de culaburazion a Brüssel.
Do l’ancunteda cun l Presidënt Fischer y l Kanzler Faymann à Drunwalder pra si vijita a Viena mo ancuntà l Vizekanzler y Minister ala finanzes Josef Pröll: “Na vijita de cumpanies da cumpanies” nsci à Pröll finà via l’ancunteda dedicheda al Tunel de basa dl Prëner y si finanziamënt. “On gran nteres che l Tunel de Prëner vënie purtà inant y chësc deberieda cun la Talia” à dit Pröll. L lauré deberieda cun la Talia y purté inant a Brüssel ie bele debujen ajache tramedoi Stati ne fossa nia boni de finanzië l tunel.
Durnwalder à nce te chësta ucajion purtà dant la cuestion dl recunescimënt di tituli de studi. “La se trata de abiné na regulamentazion per i studi nueves Bakka” dij Drunwalder. Pröll à da si pert detlarà che l ie nce tl nteres dl’Austria de purté inant la tratatives cun la Talia te chësta cuestion.
Cun Pröll, che fova stat Minister per l’agricoltura iel nce unì rujenà dl daunì dl’agricoltura. “Tl daunì saral mo plu mpurtant druché deberieda a Brüssel per nosc nteresc” nsci l presidënt dla Provinzia. Chësc dantaprima n referimënt a tò demez la cuotes dl lat che purtëssa pruvocazions per l Südtirol y per l’Austria.
La Cunvenzion dl’Elpes ie nce cun Pröll stata argumënt de descuscion. “L raion dl’Elpes ie de gran mpurtanza per vita y paussa” sorissea Drunwalder. “Deberieda messons se fé inant a Brüssel che l vënie metù a jì cundizions per mantenì l raion dl’Elpes”.
as
