Ladins ne fej nia pea l scioper di nsenianc
USP – I nsenianc dla scoles ladines ne à ncuei (mierculdi 18 merz) nia fat pea l scioper. I sindacac AGB-CGIL ova cherdà a n scioper a livel naziunel contra l guviern Berlusconi. Tla scoles tudësces ne iel nianca stat 5% di nsenianc che a fat pea l scioper.
Tla scoles elementeres, mesanes y autes ladines dla Provinzia de Bulsan lëura al mumënt 257 nsenianc. Duc ie ncuei jic do a si lëur y ne à nia fat pea l scioper di nsenianc. Tla scoles autes de Urtijëi y La Ila iel 49 nsenianc, tla scoles elementeres y mesanes de Gherdëina y dla Val Badia ie de n dut 208 nsenianc.
A livel provinziel à me puec fat pea l scioper de prutesta conta i pruvedimënc dl guviern a Roma n cont dla furmazion. Tla scoles de rujeneda tudëscia iel stat 237 nsenianc che à fat pea l scioper. Chësc fej ora na perzentuela de 4,8. Feter la medema cumpëida iel nce unì arjont pra i nsenianc cun la stiera de rodul, cun 4,9. I dirijënc dla scoles tudësces ie ncuei duc jic a lauré.
as
