Cumiscion anjenieda per l cuncors di artisc’ ladins
USP – La Repartizion ala Cultura ladina dla Provinzia de Bulsan à scrit ora n cuncors per duc i artisc’ ladins. Ncuei (18 merz) à la cumiscion abù si prima ancunteda per se anjenië ca. L cuncors per artisc' ladins ie chëst ann nce unì giaurì a artisc’ dla valedes ladines dl’autra doi provinzies.
Per la cumiscion dl cuncors per artisć ladins se à dat ca l diretëur dla Scola d’Ert de Urtijëi Karlheinz Mureda, l prufessëura de storia dl’ert Danila Serafini, l artist y espert dla cunsulta tudëscia, Gotthard Bonell, l artist cunesciù dla Val Badia Claus Vittur y la storica d’ert Sabine Gamber.
L’ancunteda da ncuei a Bulsan ie stat ucajion per n prim cuntat danter i cumëmbri y per n barat de esperienza te chësc ciamp. “L cuncors à na si bandida ufiziela, l’ancunteda da ncuei ie stata de utl per prejenté y nfurmé la cumiscion sun duc i aspec de chësta bandida” nsci l cuordinadëur Alexander Piccolruaz dl Ufize provinziel per la cultura ladina.
L titul dl pest scrit ora ie “Concurs artistich 2009… eroism, inier, incö doman” y fej referimënt al ann comemoratif de 200 ani dala batalia tl Tirol cun Andreas Hofer. Fé pea possa duc i nteressei sëura 18 ani che vif tla cin valedes ladines dla Dolomites. “Ulon cialé sëura la sëides provinzieles ora y nce dé la puscibltà ai artisć de Fascia, Ampëz y Fodom/Col” sorissea l assessëur provinziel ladin Mussner. L pest scrit ora pieta na ucajion ai artisć ladins de se museré danter ëi y nce de giapé na valutazion de si opres da na giuria de esperc.
Nchin ala fin de mei 2009 possel unì dat ju depënc, grafiches, scultures, istalazions, ert conzetuala y n.i. L muessa unì dat ju schizes, dessenieis y material original, unfat sce l’opera ie bele unida realiseda o ie mo da fé. Sëuraprò al pest de 15.000 Euro possa l opra che vënc unì metuda ora tla Galaria Prisma a Bulsan. L pest unirà sëurandat pra na zeremonia ufiziela.
Cun l pest per artisć uelen judé a jì inant cun la gran tradizion artistica dla valedes ladines. “Dai ani iel te nosc luesc unì mustrà gran creatività y n bon livel tl ciamp dl’ert, dessegur nce na esprescion dla Scola d’Ert a Urtijëi. Ulon cun l pest dé na sburdla de mutivazion acioche dantaldut jëuni posse jì inant sun chësta streda” sorissea l assessëur Florian Mussner.
Nteressei al cuncors per artisć y artistes ladines possa damandé do nfurmazions plu avisa tl Ufize provinziel per la cultura ladina a Bulsan (tel. 0471-417020).
as
