Cuncors de furmazion politica
USP – 180 sculeies da caranta scoles de rujeneda tudëscia, taliana y ladina à fat pea l cuncors de furmazion politica 2009. I prims de uni categuria puderà fé pea la finela a livel dl Tirol, ai prims de auril a Dispruch. Matthias Vinatzer ie terzo tla categuria per scoles de rujeneda ladina y taliana.
L savëi n cont dla crisa economica ie chëst ann stat l pont plu damandà ai sculeies dla scoles mesanes y scoles autes n ucajion dl cuncors de furmazion politica 2009. I cuncurënc à nce messé respuender a dumandes n cont dl’Union europea, argumënc nternaziunei, urganisazions y la storia taliana y dl Südtirol.
Sëuraprò al savëi messova i cuncurënc nce vester asvelc. Per la respostes ova i passa 180 sculeies me mes’ ëura dl’aurela. I concurënc se ova cualificà ala finela tres eliminazions fates te si scola. De ndut à tlo fat pea 2900 sculeies.
Tla categuria per scoles de rujeneda taliana y ladina à venciù Matteo Sartori dla scola mesana Marcelline de Bulsan. Matthias Vinatzer dla Scola Auta Raetia de Urtijëi ie ruvà terzo.
I primes trëi dla sies categuries puderà ai doi de auril fé pea la finela per grupes a livel dl Tirol a Dispruch.
as
