Forum sun l lëur da paur tla montes, n merdi a Brüssel
USP – Tla montes ne à l lëur da paur nia la puscibltà de espanscion o de na cultivazion plu ntensiva, la vën laurà cun dut d’autra cundizions che no ti raions ala bassa. “Damandon ala Union europea che la recunësce chësc y che la tole pruvedimënc” nsci l assessëur provinziel Hans Berger. N merdi 31 de merz uniral a Brüssel fat n var de chësc viers cun l forum sun l lëur da paur tla montes.
La cin regions Südtirol, Tirol, Trentin, Vorarlberg y Bayern mët a jì cun sustëni dla Slovenia l forum sun l lëur da paur tla montes. Tres chësc uelen a Brüssel sensibilisé i respunsabli de politica y aministrazion n cont dla situazion particulera ti raions da mont.
Che l sarà n forum de livel aut mostra bele la prejënza dla cumissera dl’UE per l’agricultura Mariann Fischer Boel, che prejenterà la posizion dla Cumiscion europea de viers dl lëur da paur tla montes. “On de bon cuntac cun l segondo respunsabl dl Cabinet de Fischer Boel y tres chësc sons stai boni de fé unì la cumissera al forum y arjunjan che la se debe nce ju cun chësta materia” dij l assessëur Berger.
L prufessëur dla Università de Dispruch Gottfried Tappeiner purterà dant la dificulteies dl lëur da paur tla montes, Manfred Bötsch dl Ufize svizer per l’agricoltura analiserà i pruvedimënc speziei y l minister per l’agricultura del Bayern, Helmut Brunner prejenterà prupostes per sustenì chisc raions. Sun la situazion particulera tla Talia rujenerà ala fin dl cunvëni Geremia Gios dla Università de Trënt.
Bele l di dant, n lunesc ai 30 de auril uniral fat n cunvëni europeich sun la defendura dl fonz tla sënta dl’Euregio a Brüssel. Tlo fajerà nce pea reprejentanc dla direzion generela dla Cumiscion europea.
as
