Dala Jonta provinziela dl 30 de merz
USP – Nia me una lege finanziera, ma leprò mo doi leges “ombnibus”. Chësta ie la linia sun chëla che la Jonta Provinziela ie ncuei (30 merz) stata a una y che ti vën prejenteda ala frazions te Cunsëi provinziel. La Jonta provinziela à ncuei dat pro l program dla BLS (Business Location Südtirol) y la data per l cuncors dl Fond soziel europeich.
L Presidënt Durnwalder à menà la senteda, ma ne à per via de n tisel, nia fat la cunferënza stampa daldò.
Lege finanziera cun doi leges “onmibus”
Per arjonjer che la lege finanziera vënie riesc data pro te Cunsëi provinziel à la Jonta ncuei dat ora na linia nueva. La pruposta per la lege finanziaria che unirà mo chëst ena prejenteda tl Cunsëi, cuntën me plu articuli che ie liei a na maniera plu strënta cun l bilanz o a dates da tenì ite. Aldò dla lege dal ann passà, possel me unì jit inant nchin de auril cun l bilanz provisor.
Deberieda cun i articuli che reverda la pert finanziera, dëssa la lege nce tò ite articuli che ie de gran prëscia. “La se tata de cuestions tachedes a dates o de leges che muessa unì adatedes ala normes stateles o dl’Europa” spiega l vizepresidënt Hans Berger. Danter chëstes iel nce regulamentazions che lascia pro de ngrandì la cëses te na pitla mesura, sce la cësa vën ressaneda per sparanië energia. “On prëscia ajache ulon purté inant nosta regulamentazion permez a chël che l guviern Berlusconi à cunedì” spiega l assessëur al’urbanistica Michl Laimer. Cun la puscibltà dl ngrandimënt ulëssen arjonjer doi fins te un n iede: da una pert vëniel a se l dé de plu cubatura zënza adurvé grunt da nuef, y dal’autra pert unissel nvià via n program che ti vën ancontra a de pitla firmes da tlo.
Duc i autri articuli che ne taca nia a na maniera tan strënta cun la pert finanziera y che ne ie nia tan de prëscia, uel la Jonta provinziela tò ora dla lege finanziera y mëter te doi leges “omnibus”. Una de chëstes ie per l’urbanistica, la despuscions y l dërt de frabiché. La segonda lege dëssa regulamenté de plu ciamps economics. “Chësta linia che ie ncuei unida data pro dala Jonta provinziela, ti vën śën prejenteda ai portausc dla frazions de Cunsëi” spiega l’assessëura ala finanzes Barbara Repetto. N reprejentanza de Dunwalder, menerà ëila ncuei domesdì la tratatives cun la frazions.
Program dla Business Location Südtirol
L program de atività dla sozietà per l marketing de grunc da frabiché Business Location Südtirol (BLS) ie ncuei unì dat pro dala Jonta provinziela. Aldò de chësc iel cater ponc de majer mpurtanza che reverda l marketing, l nridlamënt, l meter a desposizion grunc y l’aministrazion.
N cont de marketing se tratela de fé al savëi y pité Südtirol sciche posizion nteressanta per nridlamënc economics nce sëura la sëides provinzieles ora. La va de fé al savëi la zifres n cont dla posizion per nridlamënc, de tò su cuntac cun firmes da tlo y da oradecà, de anjenië na plata internet y de sensibilisé la Populazion sun l valor dl’economia. Sëuraprò dëssel nce unì fat marketing per l Südtirol sciche luegia de produzion de filmes.
Tl ciamp dl nridlamënt se tratela che la BLS se feje inant sciche pont de referimënt per la firmes nteressedes. La sozietà BLS se cruzierà nce dla pozedures per l nridlamënt y cumpanierà la firmes tla cuestions che taca leprò.
Per chël che à da n fé cun l mëter a desposizion grunc, iel debujën de fé da mediatëur a crì na luegia adateda o firmes nteressedes per lueges bele anjeniedes. Duvier dla BLS ie nce chël de se cruzië dla nfrastrutures primares y la proietazions, sciche i planns de atuazion.
L’asministrazion dëssa vester flessibla y no custé massa, per pudëi ti sté do ai duvieres dla sozietà.
Data dl Fond soziel spënta
La Jonta a spënt de n mëns la data dl cuncors dl Fond Soziel Europeich. Mpede nchin ai 15 de auril, possa la firmes se adaté ala desposizions nchin ai 15 de mei. Minà iel dantaprima la cunvenzion nueva che vën firmeda danter la Provinzia y i Partner soziei, cun la puscibltà straurdinera de sustëni per chëi che à perdù l lëur per via dla crisa.
Cooperatives de garanzia
La Jonta provinziela à ncuei dat pro de mëter adum nchin d’autonn la cooperatives de garanzia. Na sëula cooperativa dëssa pona vester a desposizion a duc i ciamps, nce chëi che nchin śën ne pudova nia se stizé sun na cooperativa de garanzia. L mëter adum dla cooperatives dëssa fé sparanië y purté plu efizienza. Chësc dantaldut te tëmps de crisa canche la garanzies de capital ie de gran mpurtanza. La cooperatives de garanzia à l duvier de judé de pitla firmes a giapé capital te chël che les sëurantol la garanzia per i scioldi mprestei.
as
