Delegazion tudëscia y franzëusa vijitea la scolines ladines
USP – N juebia (2 auril) unirà na delegazion l’urganisazion "Pestalozzi - Fröbel" dal Deutschland y dala Franzia a vijité la scolines ladines cun trëi rujenedes. N se aspieta feter 30 persones danter educadëures de scolines y d’autra espertes y esperc de pedagogia infantila. Sun l program dl di iel na vijità ala scolina de Sëlva sciche ejëmpl per la 17 scolines ladines.
L cunesciù prufessëur Otto Filzinger, gran espert de pedagogia interculturela cumpanierà la delegazion. L fin de chësta vijita ie de udëi coche l vën laurà te nosta scolines cun plu rujenedes y de mparé a cunëscer nosta situazion linguistica.
For plu y plu esperc y espertes tl ciamp dla rujenedes y dla pedagogia mostra gran nteres de mparé a cunëscer l model linguistich dla scolines y scoles ladines.
L model linguistich de nosta scolines à l prinzip de nia spartì la mutans y i mutons aldò dla rujenedes ma de lauré cun metodologies pedagogiches ntegratives ulache uni rujeneda giata si lerch. Chësc porta al passé da una rujeneda a l'autra nia me per cajo.
Reprejentanc di media ie nviei a documenté chësta ancunteda cun la delegazion dl Prof. Filzinger.
N juebia, 2 de auril,
dala 9.30 danmesdì tla scolina “Surëdl” te Sëlva.
as
