Cunsulta ladina per manco burocrazia
USP – Te si prima senteda à Cunsulta ladina nueva ncuei domesdì (prim auril) udù dant manieres per smendrì la burocrazia ala lies cultureles tla valedes Ladines. “Chëi che se dà ju per la cultura ladina y fej ulentariat ne possa nia mo unì ciariei cun truep lëur burocratich, sën ie unì l mumënt de fé zeche per smendrì burocrazia” à dit l assessëur provinziel ladin Florian Mussner.
L argumënt prinzipel dla senteda costituënta dla Cunsulta culturela ladina ne ie ncuei a Bulsan nia stat la spartizion de cuntribuc provinziei, ma l tò ju pëis burocratich ala lies cultureles. I cin cumpunënc à menà na descuscion sun co che possa cuncretamënter unì smëndri l lëur burocratich per chëi che se dà ca ativamënter per curé la cultura ladina. Per l’atività ordinera uniral da chëst ann dat ora nchin a 3.000 Euro te na forma plu scëmpla y cun manco mpëni burocratich per la lies. Giuridicamënter rejonen tlo de suvenzions y nia de cuntribuc. Chësc uel di che mpede messei dé jù la contes, bastel per chësta somes documentè l’atività che ie unida fata. La contes muessa la lies me tenì su n cajo che l unissa fat cuntroi. “Chësc ie n prim var per ti unì ncontra ai ulenteres dla lies cultureles, sce fajeron de bona esperienzes cialerons de auzé la somes per chësta forma de sustëni economich” dij l Assessëur provinziel ladin.
La Provinzia de Bulsan à danter istituc, ufizies culturei, Museum ladin y grupes de lëur, metù mpe de plu istituzions che lëura cuncretamënter per la cultura ladina. L assessëur ladin Florian Mussner se damanda che l vënie laurà ora fins da arjonjer ntan chisc cin ani de legislatura. “Ulon tò ca n di y lauré ora deberieda co che dëssa jì inant l lëur culturel ti proscimi ani” à dit Mussner. Fe pea dëssa tlo nce la Cunsulta culturela ladina. La maniera co che vën tenì chësc di y la data, unirà laurei ora ntan la proscima enes.
Davia che l bilanz provinziel 2009 ne ie mo nia unì dat pro, à la Cunsulta Ladina permò pudù manejé la terza pert (33%) di scioldi che sarà chëst ann a desposizion per sustenì l lëur culturel tla valedes ladines. Tla prima senteda iel dantaprima unì tratà dumandes de cuntribuc che n ne ova nia plu pudù tò n cunsciderazion ala fin dl’ann passà.
La Jonta provinziela ova de fauré dat pro da nuef i cumëmbri dla Cunsulta culturela ladina. Do lege ie l assessëur ladin Florian Mussner presidënt de chësta cumiscion. Sun pruposta dla lies cultureles ie unic numinei Hubert Irsara da La Ila y Bruno Senoner de S.Cristina. Sciche esperc dl ciamp ie Lois Ellecosta da Al Plan y Hilda Sottara da S.Martin unic numinei te cunsulta. L lëur da scrivan sëurantol per i proscimi cin ani Alexander Piccolruaz de Corvara, che lëura tl Ufize provinziel per la Cultura ladina. Duc i cumëmbri fova nce tla Cunsulta dla legislatura passeda.
Na gran pert dl lëur dla Cunsulta culturela ie chël de tò tres la dumandes per cuntribuc culturei y de dé n bënsté. Per de ora i cuntribuc provinziei ne iel chëst ann nia plu debujën de na delibra dla Jonta provinziela. Cun scialdi manco burocrazia unirà i cuntribuc dai ora tres decret dl assessëur provinziel ladin.
as
