Jonta provinziela dl 6 de auril
USP – De gran atualità ie ncuei l aiut da pert dl Südtirol per l Abruzzo tucà dal tremot. Erich Kostner de Badia giaterà ai prim de mei la uneranza „Stella al merito del lavoro“ a Bulsan, chësc à fat al savëi l presidënt dla Provinzia Luis Drunwalder ncuei (6 auril) do la senteda dla Jonta provinziela. I assessëures à ncuei nce rujenà dla Mobil Card, la mesures contra l meldefuech ti hotiei y la pitla scoles di luesc da mont.
Bele dala 7 da duman iel unì nciarià la Prutezion zevila dla Provinzia de Bulsan de mandé diesc persones cun sies mascins tl Abruzzo n aiut ala persones tuchedes dal tremot. “N iede iel debujën de coordinazion y pona puderon mo mandé do jënt, mesuns y aiuc finanzieres tl Abruzzo” à dit l presidënt Drunwalder che à nce mandà n pensier de conduel ai parënc dla vitimes dl’ultima nuet. Canche la cumpëida di morc fova bele a 50 cun 15.000 cuatieres desdrui y 50.000 persones zënza tët, à la Jonta provinziela segurà de ulëi judé. Firmes privates à bele fat al savëi de vester anjeniedes a mëter a desposizion materiai de aiut per chëi che ie restei zënza cësa. Chisc dis uniral nce giaurì n fond per dunfiertes.
Aiuc economics
La Jonta provinziela à udù dant n catalogh de 21 ponc per judé zitadins tuchei dala conseguenzes dla crisa economica mundiela. “La priorità dëssa giapé chëi che à perdù l lëur. Sustenion perchël la furmazion y abiné n lëur nuef” à dit Durnwalder. Udù dant iel nce pruvedimënc speziei per la families che muessa per ejëmpl paië ju debic. Nchin ala proscima senteda dla Jonta purterà i assessëures prupostes che unirà pona scrites adum per la senteda te doi enes.
Uneranza per merit tl lëur
La uneranza “Stella al merito del lavoro” dëssa chëst ann ai prim de mei unì fata per l prim iede a Bulsan. Nchin śën ie la uneranza daniëura unida fata deberieda danter Trënt y Bulsan. Davia che ne ie nia unida azeteda la pruposta de baraté a rotazion la luegia de sëurandata, la fajerà Trënt y Bulsan, uni un per si cont. Ai prim de mei unirà chëst ann unerà l piunier dl turism da inviern Erich Kostner de Badia y Marina Spadafora, che se à fat merit tl mond dla moda.
Mobil Card nce per museums
Per chësc instà dëssa la Mobil Card nce tò ite la ntredes ai museums provinziei. L ann passa fovel unì vendù 119.000 de chësta chertes per turisć, da furné cun duc i mesuns publics. “Ulon pité n bon priesc nce per i museums, zënza che n muessa tò ca l auto” à spiegà Drunwalder.
Pruvedimënc ti hotiei
Na lege statela se damanda che nchin ala fin de juni muessel unì adatà i pruvedimënc contra l meldefuech ti hotiei. N se aspieta che l Stat spënje chësta data ajache trueps muessa mo lascé fé i lëures. Sciche à nce dit la Chëurt di conc, ne possa la Provinzia te chësc cajo nia fé pruvedimënc per si cont. L presidënt dla Provinzia se damanderà dal Guviern a Roma che la data vënie spënta.
Ulentariat soziel
Per la ann 2009 à la Jonta provinziela dat pro 55 stieres per ulenteres che fej l ann soziel. Chëstes reverda nteressei sëura 28 ani che possa se crì ora danter de plu formes. La Provinzia à udù dant lëures soziei per 24, 16 o nce 8 mënsc, te chëi che l possa unì laurà 40, 30 o nce 20 ëura al ena. La Provinzia de Bulsan dà n paiamënt, aldò dl’ëures, danter 450 y 360 Euro al mëns. L Stat ova bele udù dant 90 stieres per ulenteres nchin 28 ani. Chisc giapa 433 Euro al mëns.
Zënter per l lën
L zënter de cumpetënza per l lëur cun l lën dëssa unì spustà dala scola prufesciunela a Persenon al Zënter tecnich y de inuvazion TIS a Bulsan. “Chësc zënter per l studi y l svilup se adatea miec per chësta cumpetënza, perchël ons nce ulù la spusté” à dit Durnwalder.
Pitla scoles da mont
La scoles cun manco de 5 sculeies muessa unì śaredes. Te chësta situazion ie chëst ann la scola de Pavigl tl Chemun de Lana. Per autra cater scoles cun 5 nchin 9 sculeies à la Jonta fat ora de aspité mo n ann. Sce ne ëssa nia da ruvé leprò mo sculeies messerà nce chësta scoles ti chemuns de Sant in Tufers, Malls, Eppan y sun Prëner unì śaredes. De ndut iel tla Provinzia de Bulsan 20 scoles che manacia de mussei śaré ajache l mancia sculeies.
as
