Cëses de lën per i tuchei dal tremot: ancunteda cun Durnwalder
USP – La cëses de lën dla fundazion dla firma Rubner de Kiens dëssa vester de aiut tl raion tucà dal tremot a L’Aquila. Ncuei (14 auril) à reprejentanc dla firma de Puster prejentà n proiet al presidënt Durnwalder per fé su nchin a mile cëses pre-frabichedes te tëmp de trëi mënsc. La prima doi cëses à la fundazion dla firma Rubner scincà.
Reprejentanc dla firma y dla fundazion Rubner à ncuei pudù prejenté al Presidënt dla provinzia l proiet de fé su da nuef cëses tl Abruzzo. L ie unì mustrà co che cëla ora l model per una familia de chël che l ti vën scincà doi pec ala persones tuchedes dal tremot. La cëses de lën ie unides anjeniedes pernan che n à audì dla catastrofa. “Pernan che n savrà ula che possa unì fat su la doi cëses de model, puderà muever i lauranc dla firma” à dit Durnwalder. Te tëmp de trëi mënsc fossen boni de fé su nchin a mile de chësta cëses.
Cun chësc model de cëses possen ti anjenië ala persones che à perdù si cësa, na bona soluzion de albierch che possa nce unì adurveda per truep ani.
L Presidënt dla provinzia à bele metù a jì i cuntac cun la sënta de referimënt a Roma per l fé su da nuef la cëses desdrudes dal tremot. Śën speren de abiné na forma de culaburazion zënza pierder tëmp cun cuestions burocratiches.
as
