Mostra de reperc archeologics de Ciastel y Sëuc
USP – I reperc archeologics che ie ultimamënter unic abinei tl raion de Ciastel y Sëuc sarà da udëi da duman, ai 16 nchin ai 26 de auril. La mostra particulera metuda a jì dal Ufize provinziel per bëns culturei sarà da udëi per diesc dies tla scola mesana “Leo Santifaller” a Ciastel. Ai 16 y 27 de auril uniral tenì doi cunferënzes.
Tl raion “Grondlboden”, tl zënter de Ciastel, an ti ultimi doi ani abinà fusties de abitazions dl tëmp neolitich plu jëunn (4.000 ani dan Gejù) che se à mantenì drët bën per via dl fonz tume. L ie unì abinà pertes de lën laurà te trames y breies, che ie i reperc de lën plu vedli che ie unic abinei tl Südtirol. Cun na cunferënza sun chisc reperc de Umberto Tecchiati dl Ufize per bëns culturei gëura la mostra a Ciastel duman 16 de auril dala 8 da sëira tla Scola mesana. Chësta mostra dal titul archeologia a Ciastel y Sëuc, resta davierta per diesc dis, ntan l orar de scola, nchin ai 26 de auril.
A Sëuc an abinà la luegia de cult dl tëmpl dl fier te chëla che l ie unì brujà tieres per sacrifize. L se trata tlo de una dla puecia lueges de dut l raion dl’Elpes che se à mantenì drët bën. De chisc reperc rujenerà l prufessëur Paul Gleirscher, diretëur dl museum a Klagenfurt y l archeologh Hans Nothdurfter, n lunesc 27 de auril dala 8 da sëira tla Cësa de Cultura a Sëuc. I doi esperc à nce scrit na publicazion sun chisc reperc.
Tla mostra a Ciastel saral nce da udëi reperc che ie unic giavei ora tla streda Valzura a Sëuc. Tlo an abinà testemunianzes de abitazions dl tëmp dl bront, cun n mur de n furtin ulache ntëur 1.400 dan Gejù fovel unì metù ju n cë de na jëuna.
as
