Jonta provinziela dl 20 de auril
USP – La Jonta provinziela à te si senteda da ncuei (20 auril) dat pro 500.000 Euro per judé la populazion tl Abruzzo, tucheda dal tremot. I pruvedimënc per judé la jënt dla Provinzia de Bulsan, tucheda dala crisa economica unirà prejentei te na cunferënza stampa n juebia danmesdì. Chësc à fat al savëi l presidënt dla Provinzia Luis Durnwalder, riesc do la senteda dal Jonta.
500.000 Euro per l’Abruzzo
La Jonta provinziela à ncuei dat pro 500.000 Euro per judé la persones che à per via dl tremot dl 6 de auril perdù si cësa. Chisc scioldi dëssa unì adurvei per fé su da nuef la cëses desdrudes. Cuncretamënter ciun aiuc, muessa permò unì fat ora cun la region Abruzzo. “Penson a cëses pre-frabichedes de lën o de sëurantò vel strutura. A uni maniera ulëssen judé cun prestazions y nia mandé ju scioldi” à dit Durnwalder che uel nce cialé che la Region Trentino-Südtriol debe la medema soma. L ena passeda à la Jonta provinziela de Bulsan bele dat pro 270.000 Euro per pruvedimënc de prëscia.
Pruvedimënc contra la crisa
La Jonta Provinziela à ncuei dat pro n pachetl de pruvedimënc per judé la populazion tucheda dala cunseguënzes dla crisa economica. Ponc zentrei ie l mantenimënt dla stieres y judé families ruvedes ala strëntes per via dla crisa. L pachetl de pruvedimënc unirà prejentà n juebia dala 11.00 danmesdì.
Sënta per l IPES
La Jonta provinziela à dat pro che l l vënie scrit ora da nuef n cuncors per na sënta dl Istitut per cuatieres soziei IPES. Al mumënt à l istitut si ufizies te 5-6 lueges defrëntes. „L ie debujën che l istitut IPES giape tosc na si sënta aministrativa“ à dit l presidënt Durnwalder. Dan doi-trëi ani fovel bel unì scrit ora n cuncors, ma aldò dla cumiscion tecnica provinziela ne ova deguna pruposta respetà i criteries metui dant.
Personal tla scoles
L raport danter cumpëida de nsenianc y cumpëida de sculeies dëssa resté unfat. Chësc à i assessëures provinziei ncuei fat ora n cont dl plann provinziel di nsenianc. Da nuef iel che i diretëures dla scoles dëssa nstës fé la partizions aldò dla dificulteies tla singula tlasses.
Privatisć tla scola auta
La situazion de privatisć che ulëssa zapé ite te tlasses dla scola auta o che ulëssa fé ejams ne fova nia tlera. Śën à la Jonta provinziela fat ora che sce n privatisć ne passa nia l ejam de amiscion d’ansciuda, possel cun al plu trëi materies negatives, fé do l ejam d’autonn.
Fundazion nrescides y svilup
La Fundazion per nrescides y svilup metuda mparé dan n valgun ani per lege ne ova mo degun capital a desposizion. La Jonta provinziela ie stat a una che l ti vënie metù a desposizion 150 milion de Euro. Cun chësc capital dëssel unì fat nvestimënc y cun l davani dëssel unì finanzià la fundazion nstëssa. L capital unirà sëurandat n puech al iede, plu avisa l mez de tant che vën uni ann paià de reviers al fond de rotazion. Nchin śën iel bele unì dat 44 milion de Euro. La Jonta à nce dat pro l cunsëi de aministrazion cun l espert de economia Oskar Kieswetter sciche presidënt, la pruf. Johanna Mair duzënta de management strategich y nrescides, Peter Mayr espert de investimënc y finanzes, Barbara Kolm esperta de economia, Giuseppe Salvadori numinà dala lies economiches.
Vijita al tunel dl Prëner
Ai 11 de auril jirà i cumëmbri dla Jonta provinziela a vijité l cantier dl tunel dl Prëner. Duc i assessëures dëssa se fé n cheder dla situazion sun l post y di lëures. Nce i reprejentanc di media ie nviei.
Ancunteda cun Chemun de Bulsan
Ai 25 de mei saral n’ancunteda danter aministradëures dla Provinzia de Bulsan y l Chemun de Bulsan. “Proscimamënter muessa l chemun tò dezijions mpurtantes per l tëmp nchin ala veles de chemun, n auter ann d’ansciuda. Deberieda ulons cialé cie che l ie mesun fé te de plu ciamps, che va dal’urbanistica, ala nfrastrutures, soziel o cultura” à dit Durnwalder.
as
