Nutizies per ladin sun la plata dl Ufize stampa (cun audio)
USP - L Ufize stampa dla Provinzia de Bulsan à mudernisà si plata internet tla rujeneda ladina. L servisc nuef per i media de rujeneda ladina y per duc i nteressei ie online da ncuei (23 auril) sota l’adres “provinzia.bz.it/uspl”. La comunicazion da pert l Guviern provinziel y di Servijes dla Provinzia de Bulsan vën fata cun comunicac stampa, video y ntervistes a usc, nce per ladin.
L servisc dl Ufize stampa tla rujeneda ladina ie trëi iedesc de utl: per la redazions, per duc i nteressei y per la rujeneda. I comunicac vën mandei ora a duc i media de rujeneda ladina y tl medemo tëmp possa duc i nteressei liejer do la nuviteies per ladin tl internet. “Scrì de cuestions aministratives per ladin ne ie nia for tan scëmpl y chësc servisc desmostra che n possa se nuzé de nosta rujeneda nce te chisc caji. Per la cura dla rujeneda iel dessegur n cuntribut mpurtant” spiega l assessëur ladin Florian Mussner.
La pert zentrela dla nueva plata internet per ladin dl Ufize stampa ie i comunicac cun fotografies. Da nuef iel che l vën fat video y ntervistes a usc per ladin. “Pudëi udëi y audì la nutizies tla rujeneda ladina ie na maniera de comunicazion che tën l var di tëmps” sorissea l assessëur provinziel ladin.
Sun la nueva plata internet possa uni un fé l abunamënt debant ala nutizies tres e-mail y ala zaita provinziela.
L Guviern provinziel y l’aministrazion publica dà inant la nfurmazions sun si atività tres l Ufize stampa y si lëur ie a chësta maniera nce trasparënt. La comunicazion ala stampa cuer nsci l duvier de nfurmé y ie tl medemo tëmp nce n servisc per la populazion. L Ufize stampa ie un di prim ufizies dla Provinzia de Bulsan che pieta si servisc ala grupa de rujeneda ladina te si rujeneda dl’oma.
La nueva plata internet à nce n’adres nueva per pudëi la arjonjer diretamënter, chësta ie: www.provinzia.bz.it/uspl
as
