144 scumenciadives de educazion politica (cun audio)
USP – I dis de educazion politica pieta 144 manifestazion per fé cunëscer l lëur dl’educazion politica y per mutivé duc i zitadins a na culaburazion ativa. L program che à bele metù man n juebia, ie unì prejentà ncuei (24 auril) a Bulsan.
Uni zitadin dëssa pudëi se fé si minonga politica y a chësta maniera vester al’autëza per judé pea ativamënter a furmé la sozietà. Zënza tenì cont sce ël o ëila, de età o jëunn, o da ulà che n vën, dëssa uni un pudëi giapé educazion politica. Chisc ie i fins di dis dedichei al’educazion politica che vën metui a jì per l segondo iede. Sce tla prima edizion fova la furmazion politica de fin dedicheda ala grupa de rujeneda tudëscia, iel chëst iede nce unì slargià ora ala grupes de rujeneda taliana y ladina. Chëst ann vëniel pità 144 scumenciadives, n culaburazion danter i Ufizies provinziei per la furmazion, i istituc pedagogics y urganisazions privates. „L ie drët se fé pensieres sun nosc dërc, le gestion dla ressorses de nosta tiera y per na zitadinanza ativa“ nsci l pensier dl assessëur ladin Florian Mussner.
L moto di dis dl’educazion politica ie la identità y la storia, fajan referimënt ai ponc zentrei dl Südtirol. „L ann 2009, dedicà ala cumemorazion di 200 ani dala batalies de Andreas Hofer, ti dà mo n azënt particuler de atualità al savëi nëut n cont de nosta storia politica“ à sorissà i assessëures ala cultura Kasslatter Mur y Tommasini ntan la prejentazion. „Mpurtant iel che l vënie crì n cheder globel dla situazions storiches“ nsci Mussner, „L fin per l daunì ie che la populazion ne dlote nia me la storia, ma che la tol pert ativamënter a scrì storia. La democrazia nes ie nia unida scincheda, la ie frut de n madurì culturel y soziel“. N ucajion dla prejentazion à l ntendënt ladin Roland Verra nvià la jënt a vester „plu prutagonisc'’“ dl suzeder politich.
Ntan i dis de educazion politica uniral pità na vela de furmazion tlassica sciche cunferënzes, seminares y descuscions cun leprò mo formes nueves, plu lesieres per chëi che sà manco nëut te chësc ciamp. Chësta vela tol ite filmes, mostres, cunzerc, teatri, jites, viages y sëires de juech.
Nfurmazions plu avisa sun i dis de educazion politica ie da giapé al nr. de telefonn Tel. 0471 413397 (e-mail: brigitte.foppa@provinz.bz.it ) o tl internet sota www.provinz.bz.it/weiterbildung/aktionstage
as
