L ruf da Bula vën segurà da nuef
USP – L Ruf da Bula tl raion de Runcadic vën segurà da nuef. Davia che i parëies dl ruf ie vedli y à debujën de unì miurei, ie i lauranc dla Repartizion provinziela per l’eghes tl lëur de ne n fé de nueves. Te chësc cajo vëniel nce cialà di pësc tl Ruf da Bula.
Te chisc lëures iel sambën unì dat la priorità ala segurëza. “I parëies dl ruf ie tan vedli che messon i fé da nuef. Leprò vëniel nce fat cin scialieres de ruf (Sohlschwellen) a na maniera che nce cun truepa ega ne vëniel nia slavatà ora l ruf” dij Rudolf Pollinger, diretëur dla repartizion per l’eghes. Nce l rone dlongia l ruf vën miurà te chëla che l vën sëntà lëns. “La ravises di lëns da ega juda a fermé l rone ntëur ruf” dij Pollinger.
Ntan i lëures vëniel nce tenì cont dla pert ambientela, tl cajo dl ruf da Bula, n cont di pësc. “Al mumënt ne possa i pësc nia drë se muever tl ruf per via dla gran pendënzes” spiega l diretëur de ufize. Per chësta rejon vëniel arbassà i parëies che tën su l material, l deslivel smendrësc y dut l ruf devënta manco ërt. Aldò dl proiet de Alexander Pramstaller ne unirà l ruf nstës nia trat ju unfat per ti lascé ai pësc raions de vita nueves.
I lëures dl Ufize provinziel per i ruves da mont a Runcadic ie bel unì scumencei ai primes de auril. Nchin ala fin de mei fejen cont de i finé via. Per chësc ressanamënt iel unì spendù ite 160.000 Euro.
as
