Sculeies de La Ila anconta Durnwalder
USP – La situazion atuela n cont dla Scola auta a La Ila y di Ladins n generel ie stai argumënc dl’ancunteda dl presidënt dla provinzia Luis Durnwalder y trëi tlasses dl Istitut tecnich y Lizeo de La Ila.
A La Ila ne fovel l’ann passà nia unit a se l dé na prima tlas dla scola auta. “Sce l ne vën nia do plu iscrizions sarons sfurzei a tò pruvedimënc n cont de śaré chësta scola” à Durnwalder spiegà ai sculeies n vijita, n juebia passeda, a Bulsan. Chëst ann iel 15 iscrizions per la prima tlas y cun la furmazion de carater pedagogich sëuraprò ie la scola inò deventeda plu atrativa. L Presidënt dla Provinzia à laudà i respunsabli dla scola che sce plu da giut fova la cumpetënza dl tudësch y talian plu tosc dëibla tla Val Badia, an aldidancuei na bona cunescënza de chësta doi rujenedes zënza avëi trascurà la rujeneda ladina. La particularità dl sistem scolastich ladin y l sustëni particuler per la valedes ladins unirà me garantì tan giut che l vën nce curà la rujeneda y la tradizions. “Chësc ne fej pa deguni d’autri, chësc muessa i ladins nstësc fé” ti à Durnwalder cumetù ai sculeies.
Tl cheder dl program de scola n cont dl’sistem aministratif dla Provinzia de Bulsan, la veles dl parlamënt dl’Europa y la Jonta dla Regions europees à 33 sculeies dl Istitut tecnich y Lizeo de La Ila pudù ancunté y mené na descuscion cun l presidënt Durnwalder. La nseniantes Manuela Willeit y Jutta Valentini, deberieda cun l diretëur Albert Videsott à cumpanià na tlas dl Lizeo, la cuarta y cuinta dl Istitut tecnich a Bulsan. L’ancunteda ie unida a se l dé tres mpëni de Heinrich Huber, secreter particuler dl Presidënt dla Provinzia. L ie stat l prim iede che de plu tlasses da La Ila à pudù ancunté ufizialmënter l prim respunsabl dla Provinzia de Bulsan.
Davia che a La Ila iel nce sculeies de Fedom, iel tl’ancunteda nce unì rujenà di trëi chemuns de sëuramont che ulëssa fé pert dla Provinzia de Bulsan. Durnwalder à dit che do si minonga toca zitadins che à tan da gran storia deberieda, nce da vester te una provinzia y perchël ie ël bën a una che Cortina, Col y La Pli de Fedom possa fé pert dl Südtirol. Dal’autra pert al spiegà ai sculeies che realisticamënter saral pa bën dassënn rie che la vënie a se l dé. Nsci iela nce per na provinzia ladina, à l presidënt dit ala trëi tlasses, “Ma sce i ladins nstësc uel, possen rujené de dut.”
as
