Mussner y Kasslatter Mur vijitea i lëures a Furtëza (cun audio)
USP – Ora de n furtin militer possa nascer na luegia d’ancunteda y de cultura; chësc à la Provinzia de Bulsan mustrà cun i lëures de adatamënt tl furtin de Furtëza. Tlo vëniel do la mostra Manifesta 7, chësta ann metù a jì la mostra interregiunela. I assessëures provinziei Florian Mussner y Sabina Kasslatter Mur à ncuei (28 auril) vijità i lëures. Te chësta ucajion iel nce unì prejentà l liber "Metamorphosis" n referimënt a Furtëza.
Frabicà ti ani 1830 y adurvà nchin dl 2003 dal armeda taliana sciche magasin dala munizion: la storia militera de Furtëza ie longia, si storia zivila, chëla de luegia culturela ie scialdi plu curta. “L ann passà ons adatà la pert dessot per ativiteies cultureles cun d’instà la mostra Mainfesta 7, śën iel nce unì adatà la pert zentrela per la gran mostra interregiunela y chësc nes à custà gran mpëni.” à dit l assessëur Florian Mussner. Tl furtin ne fovel deguna nfrastrutures y tl raion ntëurvia an messé tò demez la mines.
Per la mostra interregiunela che gëura ai 9 de mei iel unì giaurì su n trumbon (Schacht) 20 metri sot, a na maniera che ruve nce permez persones cun handicap. L ie unì fat dlandri y sceles ma nce metù roles dal’ega da bever, eghes fosces, strom, culegamënc per l telefonn y nchinamei cumedà su i mures. “Nce chëst iede sons stai boni de finé per tëmp i lëures, nce sce l ie stat n gran mpëni” à dit Mussner. L custimënt di lëures cun la mubilia ie stat de 7,6 milion de Euro.
A chësta maniera possa la mostra provinziela 2009 giaurì per tëmp. La mostra Labirint::Lidënza resterà davierta nchin ala fin de utober. “I vijitadëures possa se anjenië a ancunté l argumënt dla lidëza a na maniera da plajëi y povester nce manco da plajëi” à dit l’assessëura Kasslatter Mur che se mbincia che la mostra debe na sburdla a pensé do sun la lidëza y chël che la nes da.
A Furtëza iel nce unì prejentà la publicazion nueva dla repartizion provinziela de aministrazion dl patrimone. Cun l aiut de truepa fotografies vëniel descrì la metamorphse de Furtëza y dla strutura Alumix a Bulsan. Cun chësta publicazion uelen mustré su cie che la Provinzia fej per adurvé culturalmënter de tel strutures. L liber "Metamorphosis" ie unì dat ora da "SilvanaEditoriale" y ie da cumpré per 15 Euro.
as
