L Giro d’Italia festejea 100 ani sun Mont Sëuc (cun audio)
USP – Tres la tapa dl Giro d’Italia sun Mont de Sëuc uniral mustrà a milions de persones la bela cuntreda de nosc raion tres televijion . Chësc ie chël che n se aspieta prinzipalmënter dala tapa de n mierculdi che vën 13 de mei. La tapa che festejea i 100 ani dl Giro ie unida prejenteda ncuei (06 mei) a Bulsan dal presidënt dla Provinzia Luis Durnwalder.
L 13 de mei sarà n di de sport, festa y dantaldut de promozion per l Südtirol. Cun 5 ëura de trasmiscion televisiva dala vif uniral tres l Giro d’Italia mustrà la cuntreda cun nosta bela montes a n publich nternaziunel. Sëuraprò uniral mo fat truepa d’autra trasmiscions y reportajes tla zaites, radi y internet. “Per nosc turisć che udrà nosc raions tla televijion sarà mumënc ulache i recunësc luesc cunesciui, n descedé lecorc a raions de feries y cumpanies” à dit l presidënt Durnwalder. La tratatives acioche l vënie a se l dé chësta tapa à bele scumencià da truep ani, mo cun l ambolt de Ciastel da dant, Vinzenz Karbon. La sudesfazion che la ie śën tan inant, ie perchël mo majera.
La tapa de Mont Sëuc, n mierculdi che vën, ie sun l di 100 ani do che l ie unì muet l prim Giro d’Italia. La prima tapa l ann 1909 fova da Milan a Bologna. “Pudëi festejé chësc cumplì di ani ie per nëus n gran unëur” à sorissà i urganisadëures.
La cuinta tapa dl Giro da chëst ann mesura 125 chilometri y sarà n cont de cuntreda una dla plu beles. L unirà muet da San Martino di Catrozza, passan per l Passo Rolle, Predazzo, Passo San Lugano, Auer, Bulsan, Blumau y pona i ultimi 25 chilometri per Fie y Sëuc nchin sun Mont Sëuc dal Compatsch (1.500 metri de deslivel y 11% de pendënza). I primes se aspieten tl travert danter la cinch y mesa la sies domesdì.
I auti dla carovana dl retlam y dl publich ne puderà ai 13 de mei nia furné nchin sun Mont Sëuc. N puderà lascé l auto zënza paië a Sëuc y furné samont cun la furnadoia. Durnwalder à n chësc cont laudà la sensibltà da pert di urganisadëures dl Giro che à azetà che i auti ne possa nia furné samont. Dal Compatsch uniral metù su de gran parëis per udëi la tapa tres televijion. Tla direzion che furnea chëi dala rodes unirà la stredes saredes n’ëura dan che passa l Giro, per furné de contra unirà la streda bele śareda doi ëura dant.
La Provinzia de Bulsan sustën la tapa de Mont Sëuc y pona l muever l di do da Persenon cun 100.000 Euro. “N sa tant che i menuc de televijion vel y l Giro d’Italia ie sport, ma nce cultura y tradizion, perchël vëniel nce fat chësc nvestimënt” à dit Hansi Felder, diretëur de repartizion per l cumerz.
L ambolt da Ciastel Hermann Reichhalter à sorissà che l Giro d’Italia porta n gran retlam nce per l turism da inviern. Aldò de analises de cie che à purtà la scuadres de Serie A de juech al palé a Ciastel ie unit ora che l sport da instà porta nce truep retlam per la feries sun la nëif.
as
