"Syndrome 09“ vëgn stlüt jö
USP - Sonn de tambürli, n arald y le oracl - le vedl lëgn , che röia da cuntè la storia dl virus “Syndrome“ che s’à mudé y de sü efe. Incö (9 de mà 2009) nes àl tla introduziun dla festa finala dl concurs online „syndrome 09" acompagné chilò sön la staziun dla ferata de Franzensfeste. Al concurs, laurè fora dal Heimatpflegeverband por l’ann iubilar 09 à tut pert 3500 jogn y jones. Le presidënt dla Provinzia Luis Durnwalder, l’assessuria Sabina Kasslatter Mur, l’assessuria dl Tirol Beate Palfrader y l’assessur dl Trentin Franco Panizza à premié i mius ogadus singui y i mius teams.
Le pröm pest di teams à davagné le grup de diesc scolars de Vinschgau "SkiChallenge" che â bele albü suzes tles fases da denant dl jüch. Sciöche secundo s’à plazè le team "the supergroup" y le terzo post à arjunt le grup de 11 scolars y scolares da Porsenù „Brixner Team“. La tlas 1A dla scora alta por le Sozial da Porsenù, spezialisaziun de assistënt/a por i sorvisc soziai, nominà team „sunshine“, à arjunt le cuarto post, do avëi bele n iade davagné te n’atra fasa dl jüch.
Le pröm pest individual é jü invers a Magdalena Pöhl da Algund, le secundo y terzo pest ti é jü a Matthias Puintner da Laas y Michael Hofer da Porsenù. Le presidënt Durnwalder y la assessuria Kasslatter Mur ti à surandè sü pesć ai pröms plazà. Ara se trata de bons por n iade tl Tirol storich da mile a duimile euro.
Sides le presidënt Durnwalder co l’assessuria ala scora y cultura Kasslatter Mur à pronunzié parores de lalt por l’impëgn di jogn y dles jones, che à desmostrè de savëi tröp sura süa patria.
Le fin prinzipal dl jüch online ê chël de trasmëte na vijiun globala sura la geografia, la cultura, l’architetöra, les sciënzes naturales y ambientales ai jogn y ales jones inanter i önesc y i dejenü agn, tres süa partezipaziun ativa. Chësc fin dess zënzater avëi arjunt, sciöche al é gnü sotligné incö pro la premiaziun, 3500 jogn y jones che à partezipé al jüch online por deplü mëisc alalungia.
Mo inće ćiamò n ater fin é gnü arjunt: chël dla colaboraziun sura i confins y i grups linguistics fora. Pro düć i teams che à fat impara y che à davagné êl jogn y jones de Südtirol lapró, dl Tirol y dl Trentin y almanco un o öna na ladina laprò.
„Le jüch online á dè la poscibilité de n azes particolar y creatif al ann comemoratif 2009 y nos sun dla minunga che ara va debojëgn de n te’ tru, por che jogn y jones se dais jö cun la storia, le presënt y le futur dl Tirol“ insciö à sotligné l’assessuria Kasslater Mur, che à detlarè le jüch online un de sü proieć preferîs dl ann comemoratif.
Tl ambit dla festa de contlujiun é inće stè la surandada simbolica dl jüch online „syndrome 09“ al Istitut Pedagogich Todësch. Le jüch gnarà proscimamënter metü a disposiziun dles scores sciöche mesum didatich.
Le Heimatpflegeverband de Südtirol ćiararà de atualisé i contignüs. „Syndrome 09“ gnarà pité inant te trëi lingac: todësch, talian y ladin.
Atira do la premiaziun finala di jogn y dles jones che à tut pert al jüch online, vëgnel daurì la mostra provinziala „Labyrinth:: Liberté“ tres a Franzensfeste.
USP
