A Furtëza iel unì giaurì la mostra „Labirit::Lidëza“ (audio)
USP – La mostra interregiunela 2009 ie unida giaurida ncuei sada (9 mei) tl furtin de Furtëza, dal presidënt dla Provinzia Durnwalder deberieda cun i assessëures ala cultura dla Provinzia de Bulsan, de Trënt y dl Lond Tirol. „N labirint per abiné la lidëza“ chësc ie l pensier zentrel dla mostra che resta davierta nchin ala fin de utober.
La lidëza ie n valor de fundamënta, nia renunzië per la cumenanza y la persona. Chësc ideal ne ie nce nia da arjonjer de fin, ma me da ti ruvé plu daujin. Chisc aspec pieta la basa dla mostra interregiunela 2009, metuda jì deberieda dala Provinzies de Bulsan, Trënt y dal Lond Tirol a Furtëza. La mostra ie dedicheda a n publich de uni generazion y grupa de rujeneda. Per chësta ucajion iel unì fat lëures de adatamënt dla pert zentrela dl furtin a na maniera da pité n vëir labirint che passena defin cun la mostra. Sun 14.000 metri cuadrac ie la mostra interregiunela „Labirint::Lidëza“ unida njinieda do trëi linies de referimënt : la storia, massaria da uni di y pec d’ert. Te 86 lueges defrëntes iel da udëi de ndut feter 200 pec danter mascins, illustrazions, guanc y filmes.
Passa 50 artisć de duta l’Europa mët ora si opres dedichedes al argumënt dla lidëza.
Pra la giaurida à l presidënt Durnwalder sorissà l bon resultat dl mpëni dla trëi provinzies, che dà da pensé do sun problems de nosc tëmps n referimënt ala lidëza te si truepa nterpretazions. „Lidëza de fin, resterà n ideal, ajache la lidëza de uni un va me nchin pra la lidëza dl proscimo. Per avëi lidëza iel debujën de regules de cunvivënza“ à dit Luis Durnwalder. „N cont dla trëi provinzies ie tumedes la sëides tradiziuneles y śën ie unì l mumënt de tò demez chëla sëides che ie mo restedes te nëus dedite“.
Ot sezions tematiches prejënta la lidëza y l mancë de lidëza. Chësta sezions ie dedichedes ala cumenanza, la rujeneda , mubilità, la prijunia, sëides, furmazion/scienza, crëidum y l’ert. La mostra ne à nia n parcurs ma ie liedia, spartida su te 86 locai.
Manifestazions cumpanieia la mostra de Furtëza ntan l instà nchin d’autonn. Duta la vela ie cumpanieda da n catalogh de 384 plates.
La ntreda ala mostra tl furtin, davierta nchin ai 30 de utober, ie debant.
La mostra Labyrint:Lidëza de Furtëza ie nce prejenteda tla rujeneda ladina tl internet sun la plates “www.lab09.net”.
as
Galaria dales fotografies
Prim vijitadëures dla mostra interregiunela 2009: Durnwalder cun i assessëures ala cultura dla trëi provinzies.
