Duta la Jonta provinziela tl tunel dl Prëner
USP – La Jonta provinziela de Bulsan se à ncuei (11 mei) abinà 4,5 chilometri sot te n crëp y 400 metri sota tiera per se fé n cheder di lëures per l tunel de prova per chël che deventerà l tunel de basa dla Prëner. “L proiet dl tunel ie bele realtà” à dit l presidënt ntan la vijita. Duta la Jonta provinziela à pudù udëi che l sas ie miëur de chël che n se ova aspità.
Belau n ann do che l ie unì scumencià cun i cantieres a Aicha y Mauls à duta la Jonta provinziela ncuei vijità i lëures. Da Aicha ie i assessëures furnei cun na ferata nchin iteinsom l tunel, che ie 4,5 chilometri sot tl crëp. 70 lauranc pro turnus de lëur, ti stà do 24 ëura ala fresa che geva 17 metri al di. “L sas che n abina tlo sotite ie miëur de chël che n se ëssa aspità” à dit Durnwalder. “I ie drët dur ma nce drët stabil”. Sce i lëures possa jì inant a chësta maniera, possa l tunel de prova de 10,5 chilometri danter Aicha y Mauls unì finà nchin ala fin de merz 2010.
Bele de setëmber de chëst ann dëssa unì fineda la bocula de tunel a Mauls. Tlo ne vëniel nia laurà cun na fresa, ma stlupetan l crëp a na maniera de ruvé inant 5 metri al di. A chësta maniera iesen bele ruvei 1.480 metri sot; de ndut iel da giavé ora 1.767 metri.
“Sustenion de plën chësc proiet dl tunel dl Prëner, bele ajache ne on nia alternativa” à dit l presidënt dla Provinzia. Permò canche l tunel sarà fina, puderan spusté l trasport pesoch dala streda ala ferata y nsci miuré la cualità de vita de chëi che vif sun la linia dl Prëner. Tl medemo mumënt che l vën frabicà, vëniel nce dat pëis a nfurmé la populazion a na maniera balanzeda. “Chi che ie nfurmà, sustenirà nce chësc proiet” à dit Durnwalder.
L Presidënt dla Provinzia à nce tëut posizion n cont dl finanziamënt dl tunel dl Prëner. Ntant ie finanzià l tunel de prova. Per curì l custimënt dl tunel nstës y dla linies da ti ruvé permez, iesen tl lëur de marciadé danter la Cumenanza Europeica, la banca europea per nvestimënc, l stat y la regions tuchedes. “L finanziamënt ne muessa te chësc mumënt mo nia vester segurà” Nsci Durnwalder, “Mpurtant iel che n var al iede vëniel metù a desposizion l finanziamënt per jì inant cun chësc proiet”.
as
