Prim viac dla furnadoia nueva dl Renon
USP – Da Bulsan nchin sun l Renon te manco de 12 menuc. Chësc sarà mesun cun la furnadoia nueva che ie unida festejeda ncuei (14 mei) y che unirà giaurida al publich l’ena che vën. La furnadoia nueva cumporta na revoluzion n cont dl trasport publich tl raion dla zità de Bulsan cun n mplant, danter i plu modernes dl mond.
Cun la furnadoia nueva dl Renon puderan furné da n sada 23 de mei, ma l prim viac ie bele unì fat ncuei cun autoriteies y reprejentanc di media. La mplant ie a trëi cordes y ie aldò de Michael Seeber dla firma Leitner, “l plu modern dl mond”. La destanza de 4.560 metri da Bulsan a Oberbozen (deslivel de 950 metri) sarà mesun fé te manco de 12 menuc. Tl medemo mumënt possel vester tacà ite 8 cabines da 35 persones, 24 possa sté sentei. Te n ëura saral mesun traspurté 550 persones. Da duman abenëura nchin tert da sëira puderan furné uni cater menuc cun la furnadoia nueva.
“On tlo n mplant defin modern” à dit l assessëur Thomas Widmann, “chësc sarà propi na cuncurëza per l muvimënt di auti. La furnadoia da dant menova 100 mile persones te n ann: te tëmp de trëi ani ulons nëus ruvé a mo n tant de persones”. Che l ie na nfrastrutura mpurtanta à nce sorissà l Presidënt dla Provinzia Luis Durnwalder: “Per i pendolares y per i turisć iel n nvestimënt drët nteressant dal pont de ududa economich ajache n à laurà te na culaburazion danter l publich y l privat. On abù na gran pert finanziera y n cont de dezijion, chësc sarà n model per l daunì n cont de majeri nvestimënc per l cumenanza”.
La furnadoia nueva dl Renon à custà 16 milion de Euro. 12,8 à paià la Provinzia y 3,2 la firma Leitner che puderà se nuzé per 40 ani de raions ntëur la doi stazions.
as
