Prutezion zevila per la segurëza tl camp di teremotei a Sant’Elia
USP – I culaburadëures dla Prutezion zevila dl Südtirol se cruzia dla segurëza tl camp de Sant’Elia per la persones tuchedes dal tremot tl Abruzzo. La grupa per cuntac radio, cëla do chi che possa ite tl camp, fej raides de patruliamënt, dà ora la chertes digiteles per chi che vif tl camp y cëla do canche l vën menà adalerch marcanzia o fat servijes.
“La culaburazion de nosta grupes de aiut ti raions dl tremot va drët bën” spiega l Presidënt dla provinzia Luis Durnwalder che ie nce prim respunsabl per la prutezion zevila. Chësc vën a se l dé per la spartizion tlera di lëures, ma tl medemo mumënt iel nce damandà mpruvisazion per problems che vën su te n iede. “Te n camp ne se lascia danz nia prugramé uni particuler” dij Durnwalder.
La ncëria de ti sté do ala segurëza tl camp de tendes a Sant’Elia ti ie unida sëurandata ala grupa per cuntac radio dl Südtirol. Deberieda cun uemes dla segurëza publica cëla ëi do chi che possa ite tl camp, ëi dà ora la chertes digiteles che vel sciche documënt y cun chëles che n giapa nce a maië tla mensa. Mplu fej ëi nce raides de cuntrol tl camp nstës. “Tla sentedes da uni di vëniel danter la grupes de aiut giamià ora nfurmazions, y sce l ie vel pert nia segura, ie nosc uemes dan man” spiega l diretëur dla Prutezion zevila provinziela y respunsabl dl grupa che ie tl Abruzzo Hanspeter Staffler.
Dla segurëza se cruzia nce i uemes ulenteres di judacrëp, di destudafuech y dla crëusc blancia y cuecena.
I uemes dl Südtirol se dà nce da fé che l viver tl camp ne sibe nia tan pesoch. Chësc desmostra nce la juech al palé che ie unì metù a jì danter i uemes dla Prutezion zevila dl Südtirol y i abitanc dl camp. Do n 6 a 6, à la scuadra dl Südtirol venciù trajan dai set metri.
as
