Talia-Austria-Germania sotscrij per l tunel dl Prëner
USP – L memorandum de majera mpurtanza sun l tunel de basa dl Prëner y n cont di adatamënc dla linia dla ferata, ie unì firmà ncuei (18 mei) a Roma da pert dla Talia, Austra y Germania. Sun 80 ponc iel da pert di trëi guvierns unì fat ora l plan de finanziamënt y l calënder per la realisazion dl proiet. “Chësc ie unì sotscrì trajan ite i raions che dal scumenciamënt incà ie stai protagonisc’ dl proiet” à dit l Presidënt dla Provinzia Luis Durnwalder a Roma.
L’acurdanza de ntenzion ie unida sotscrita ncuei da mesdì a Roma dai ministri al trasport Alteo Matteoli (Talia), Wolfgang Tiefensee (Germania) y Doris Bures (Austria), da reprejentanc dla ferata y reprejentanc di raions tuchei cun nce l presidënt Durnwalder. Cun chësta acurdanza se mpënia la trëi nazions ufizialmënter a finanzië y respeté la dates per realisé l tunel de basa dl Prëner damandan nce ala Union Europea de garantì si sustëni a spusté l trasport pesoch dala streda ala ferata.
“L ie n di mpurtan per l muvimënt tl’Elpes: chësta acurdanza stlarësc de plu aspec dl proiet y n cont dla funzion de coordinamënt dla Provinzies. L ie unì cunfermà che nce i raions tuchei, che à da for purtà inant l proiet, à na pert dla respunsabltà” à dit l presidënt Durnwalder, “Na resposta cuncreta per chëi che ne ti ova nia crëta”. Cun i autri reprejentanc che à firmà a Roma iesen nce a una che l uel vester determinazion per realisé i 80 ponc che n se à tëut dant. “I proscimi pruvedimënc ie i parëies contra la fuera, la suvenzion per mëter i camions sun i vagons, ntervenzions sun daz y calculé tant de trasport che ie mesun avëi sun chësta linia”. Durnwalder à nce sorissà l bujën de frabiché, dlongia l tunel nstës, la linies per ti ruvé permez.
L minister Matteoli à cunfermà che da pert dla Talia uniral nchin ala fin de juni njenià n finanziamënt de 2,6 miliardes de Euro. L minister à nce sorissà che cun l’acurdanza vëniel fat ora i singuli pruvedimënc nchin al finé i lëures tl 2020. Duc i ntervënc à lecurdà l vester a una tla cuestions de fundamënta sciche l senificat economich dl proiet per l’Europa, la ulentà finanziera, la cuantificazion dl custimënt, la dates da tenì ite y la funzion dla pertes tuchedes.
Cun l documënt se tol la Talia, Germania y Austria nce su de adurvé chël che l unirà trat ite dal daz (aldò dla diretiva Eurovignette) per finanzië la nfrastrutures dla ferata danter Minca y Verona, cun dantaprima l tunel dl Prëner. La trëi nazions à nce detlarà de ulëi purté inant l plann de finanziamënt premian chëi che mpazia demanco l’aria. Ala Union Europea vëniel damandà de miuré la cundizions per purté inant l spustamënt dla trasport pesoch dala streda ala ferata. La Talia y l’Austria se à tëut su de realisé l tunel sciche udù dant nchin tl ann 2022 y de nvië via duc i pruvedimënc che va debujën cun dantaprima l finanziamënt.
Tl’acurdanza se mpënia l guviern talian per la proietazion plu avisa de duta la linies per ruvé permez da sud. Chësc a na maniera da avëi nchin tl 2011 la delibra dl cunsëi per la proietazions economiches (CIPE) nsci che nchin dl 2013 possel unì scumencià a frabiché. La Talia à nce detlarà de nvië via per tëmp la proietazion dla pertes nia prioriteies per astilé ora che l muvimënt se mpife dan ruvé pra l tunel.
I raions tuchei ie nce a una de mëter mpe n monitoring ambientel danter Minca y Verona. Sce da chësc vëniel a se l dé cunseguënzes per l’urganisazion dl trafich, iesen nce a una de dé n sustëni. Per smëndri riesc l muvimënt sun streda uel i raions tuchei sustenì l trasport nia cumpanià y miuré l trasport di camions cun la ferata.
as
Galaria dales fotografies
