Durnwalder y Mussner ti raions dl tremot (cun audio)
USP – l presidënt dla provinzia Luis Durnwalder deberieda cun l assessëur Florian Mussner à ncuei fat na vijita tl camp de Sant’Elia, na frazion de L’Aquila tucheda dal tremot. L ie stat ucajion per rengrazië i uemes dla Prutezion zevila dl Südtirol che se cruzia da enes de chësc camp. Cun Guido Bertolaso, che ie a cë dla Prutezion Zevila dl Stat, à Durnwalder rujenà de aiuc per fé su da nuef la cëses.
Do avëi sotscrì l memorandum dl tunel dl Prëner a Roma (cëla comunicat a pert) ie l presidënt dla provinzia jit a Sant’Elia per vijité i raions tuchei dal tremot y la grupes dla Prutezion zevila dl Südtirol. L assessëur Florian Mussner y l presidënt Durnwalder à rengrazià i ulenteres y dependënc che fej pert di destudafuech, dla Crëusc Cuecena, Crëusc Blancia, Judacrëp y dal grupa radiotrasmitënc. Cun gran mpëni, solidarietà y prufescionalità vëniel pità servijes che va dala mensa ala comunicazion y nchinamei n cumpaniamënt psicologich.
I aministradëures provinziei à pudù vijité l raion te chël che 78 percënt dla cëses manacia mo de tumé sëuralauter. Tl cuntat cun la populazion ai pudù udëi tan sciazà che i l servisc pità dai uemes dl Südtirol. „Nosta jënt ie pert de na gran familia te chësc luech de tendes, ëi cëla de tré pea la jënt tl’ativiteies y chësc garata drët bën“ à dit Durnwalder. Al mumënt iel 354 persones tl camp de Sant’Elia che vën judei da 30 aiutanc dl Südtirol, mo d’autra 70 persones sëuraprò giapa uni di a maië. L vën ce fat servijes tecnics. Iust ncuei à destudafuech de Vahrn tëut ju na ciampana dal ciampanil che manacia de tumé adum, per pudëi l adurvé tl camp.
Sëuraprò a fé n bilanz di aiuc y de se fé n cheder dla situazion, iel nce unì rujenà di aiuc per fé su la cëses cun Guido Bertolaso che ie a cë dla Prutezion zevila dl stat. „On pudù fé ora che deberieda cun i chemuns se cruzieron per 50 cëses prefrabichedes de lën “ à dit Durnwalder. Chësta cëses dëssa pité albierch ai zitadins de L’Aquila per i proscimi cin ani, te chëi che la zità dëssa unì fata su da nuef. La Prutezion zevila dl stat dajerà na lerch al Südtirol ulache possa unì fat su la cëses de lën cun nce la nfrastrutures de va debujën. Firmes de Südtirol dëssa fé su chësta cëses. „Fajon cont che la cëses per Sant’Elia unirà anjeniedes ti proscimi mënsc. Dant uei mo marciadé cun l cunsorz di chemuns n cont dl judé pea di chemuns“ à dit Durnwalder. Ti proscimi dis unirà l cumandant dla Prutezion Zevila Bertolaso a Bulsan per prejenté l raion te chël che l possa unì fat su la cëses y co che n possa man man ciafië cun manco uemes dl Südtirol tl Abruzzo.
as
