Sculeies vënc l cuncors leterer cun gran creatività
USP – A Urtijëi iel ncuei (19 mei) unì premià i sculeies che à venciù l cuncors leterer per la scoles ladines. Chësc cuncors ie unì giaurì ai sculeies de duta la cin valedes ladines dla Dolomites. L ntendënt Roland Verra y l assessëur Florian Mussner à laudà la gran ceratività y la cura dla rujeneda da pert di sculeies.
Danter i prim cinch dla scoles autes, à trueps scrit poejies. „Te na bona poejia possen scrì tant che te truepa plates de prosa, perchël iel da laudé i sculeies che à adurvà chësta forma che ie plu ria da scrì“ à sorissà l ntendënt Roland Verra. Venciù à Sara Stuflesser de Urtijëi che à scrit n diare poetich drët garatà. La sculea dla prima tlas dl ITC de Urtijëi à scrit dal passà al prejënt, fajan cunfronc culturei drët soc danter la vita tl 1935 y nosc tëmps. Dut chësc adurvan plu formes de rima, demustran nsci na cumpetënza lirica mo mei ududa per na studënta de si età.
Per la scoles mesanes iel unì sëurandat doi prim pesć. Johanna Frenner de Al Plan à scrit na storia drët sensibla che ie unida premieda per si cuntenut de gran valor educatif y na rujeneda drët rica y cureda. Ëila à scrit de jënt che à messù mucé dala Palestina y ie unida a sté tlo da nëus. L’idea ala tëut dala situazion de vita de si jurmana che vif tla Palestina.
Cun na film drët uriginel, autoironich che spidlea la tendënzes y modes di jëuni, fat tecnicamënter drët bën à cin sculeies de Urtijëi ënghe venciù l prim pest dla scoles mesanes. Si film conta de n ël dla Moldavia che ie unì acusà de avëi rubà schi, ma che ie inuzënt y che à giapà la gauja ajache l ie autramënter de cultura. L lëur ie unì fat da Aron Senoner, Matteo Bernardi, Giacomo Costanzi, Stefan Cainelli y Thomas Oberkofler.
I lëures letereres premiei unirà publichei tla zaita dla Scoles ladines „Aules“. I pesć sëurandai ie bons per cumpré material de scola, libri o mujiga.
La mpurtanza de chësc cuncors ie unida sorisseda dala prejënza de truepa autoriteies y media ladins pra la premiazion tl ITC Raetia a Urtijëi. L ie una dla puecia scumenciadives che tol ite duta la cin valedes ladines ntëur al Sela. La culaburazion danter la Ntendënza Ladina, l Istitut Pedagogich, i trëi istituc culturei ladins de San Martin de Tor, Vich y Col S.Lizia y la Union Generela di Ladins ie stat n sustënì a basa lergia. Iust tla cultura vën i ladins laudei per si gran produzion de leteratura, mujiga y ert n relazion ala cumpëida dla populazion. „Cie che mancia mo ie na miëur coordinazion y n miëur lauré deberieda danter la valedes“ à lecurdà l ntendënt Verra. L cuncors ie stat n bel var de chësc vieres. N referimënt de gran atualità à nce fat l assessëur Mussner dijan che n cont dla dificulteies y polemiches de cunvivënza ie propi la scola paritetica ladina –n relazion al cuncors dedicà la dialogh interculturel - na resposta che dà n balanz ai jëuni.
Sculeies premiei dla scola mesana
1. Johanna Frenner, Al Plan
1. Aron Senoner, Matteo Bernardi, Giacomo Costanzi, Stefan Cainelli y Thomas Oberkofler, Urtijëi
3. Giulia Pedratscher, Caterina Crepaz y Anna Anvidalfarei, La Ila
4. Christian Felder, Manuel Crazzolara y Mattia Dapoz, La Ila
4. Sara Frenademez, Barbara Pezzei y Nadine Miribung, La Ila
Sculeies premiei dla scola auta
1. Sofia Stuflesser, ITC Urtijëi
2. Vanessa Ongari, Ilaria Zulian y Piera Zulian, Lizeo de Poza
3. Ruth Malfertheiner, Scola d’Ert Urtiëi
4. Jessica Pitschieler, ITC Urtijëi
5. Matteo Sommariva, de Fascia Lizeo de Poza
as
Galaria dales fotografies
Sculeies dla cin valedes ladins ie unic premiei per si creatività y cura dla rujeneda: sun palch cun l Florian Mussner y Roland Verra (foto USP/Stuffer).
