Ozonn sëura la sëida te doi raions
USP – La ciaut da instà bele de mei ne n’ie nia me da plajëi. Te doi lueges iel n sada (23 mei) unì muserà na cunzentrazion de Ozonn tl’aria che ie sëura la sëides per dé inant la nfurmazion. La doi lueges ie a Kurtinig, sëura Salurn y a Bulsan.
Canche l Ozonn arjonj 180 microgramm pro meter cubich de aria, ie arjonta la sëida per dé inant ala nfurmazion. N sada ie chësc stat l cajio te doi stazions dl Agenzia per l ambient dla Provinzia de Bulsan. A Kurtinig iel dala 7 y 8 da sëira unì muserà n valor de 187 microgram, a Bulsan iel dala medema ëura unì passa via la sëida de puech, cun n valor de 183 microgram de Ozonn per meter cubich d’aria. Aldò dl’Agenzia per l ambient fovel i dis dant valores puech sota la sëida.
Truep Ozonn vën a se l dé japé dla majera valedes danter Bulsan y Maran, tl Unterland, y sun la montes daujin. Dantaprima ie tlo minà l Renon, la Mont de Sëuc y rives su per mont. I valores auc de Ozonn ie unic a se l dé per via dla temperatures autes y l truep surëdl. La plueia y temporai che ie udui dant a scumencé cun n merdi, lascerà smëndrì la cunzentrazion de Ozonn.
Persones cun malaties de tré l fla, dëssa astilé ora de se sfadië ala lergia ntan l domesdì y da sëira, tan giut che l resta bel tëmp.
I valores atualisei dla stazions dl’Agenzia per l ambient possen cialé do sun la plates provinzieles tl internet sota www.provinz.bz.it/luft. Nfurmazions sëuraprò possen nce damandé tl Labor per chimica fisichela dl’Agenzia per l ambient (tel. 0471 417140).
as
