Cumisser dl'Europa Orban tla Ladinia cun Mussner (audio)
USP – L cumisser dl’Europa per la mendranzes Orban à ncuei (15 juni) vijità la Jonta provinziela de Bulsan per mparé a cunëscer de prima persona co che l cunzet dl plurilinguism ie unì metù n drova tl Südtirol. Domesdì à l assessëur ladin Florian Mussner cumpanià l cumisser tla Ladinia.
“La Provinzia de Bulsan ie n ejëmpl de plurilinguism per truepa regions dl’Europa”: l cumisser Leonard Orban à mustrà estusiasm a udëi tant che l ie unì arjont per la grupes de rujeneda tl Südtirol. La vijita dl Cumisser ie domesdì jita inant cun na vijita tl Museum Ladin a S.Martin ulache l ie nce sta n’ancunteda cun reprejentanc dla scola ladina.
“A udëi nosta realtà à l cumisser Orban nce giapà i mpulsc che l se aspitova y nce da nosta pert ons giapà mpulsc n cont de na vijion mo plu europea dla mendranzes” à dit l assessëur Florian Mussner. La realtà ladina cun l model de scola paritetich fej da scola tla Cumunità Europea. “Nviei a jit inant cun l nseniamënt de plu rujenedes ajache l ie n arichimënt de valor fundamentel sibe al livel persunel che a livel culturel. Dal’autra pert ne iel nia pericul che n pierd nstësc l identità” à dit Obran. “La Cumiscion Europea ne à nia cumpetënza de mëter dant l mondel scolastich ala regions, ma la vëij l model ladin de bon uedl y la sarà dessegur de chëla de sustenì l plurilinguism”. Per l assessëur Mussner ie la vijita dl Cumisser ala mendranzes tla Ladinia nce stata ucajion de damandé n sustëni per la mendranza ladina. L domesdì ie stat n barat de mpulsc, la realtà ladina per l’Europa y l da pert dl cumisser per la Ladinia.
as
