Televijion devënta digitela: plata internet de nfurmazion
USP – De utober fina l’era dla trasmiscion televisiva analogica. Cie che unirà do ie la televijion digitela mandeda ora per tiera. Ma cie ie pa veramënter l digitel sun tiera? Cie saral pa debujën per udëi la televijion? Co che funzionea pa n decoder? Chëstes ie me n valguna dla dumandes sun chëles che n giapa resposta sun la nueva plates internet www.provincia.bz.it/digitale-terrestre/ anjeniedes dala Provinzia de Bulsan, la RAS y la Informatica Alto Adige. La plates ie unides anjeniedes per nfurmé i zitadins dla mudazion dl sistem de televijion tl Südtirol ala fin de utober.
Do che te 10 chemuns vëniel bele purvà la televijion digitela, saral per la fin de utober te duta la Provinzia de Bulsan me plu da udëi televijion tres trasmiscion digitela y nia plu tres via analogica.
Acioche la populazion posse se anjenië per tëmp ala mudazion iel unì njenià plates de nfurmazion che ie da ncuei (16 juni) online. Sota l’adres www.provincia.bz.it/digitale-terrestre iel da giapé spiegazions n cont de coche funzioneia l sistem nuef, cunsëies n cont de aparac che n muessa se anjenië per ne resté nia zënza televijion d’autonn y respostes ala dumandes fates plu suvënz. Sun la plates internet possen nce liejer do chi che à l dërt de cuntribuc da pert dl Stat per cumpré n decoder.
Per udëi la televijion digitela ne ie nia debujën de adaté l’antëna, l tleca avëi na televijion moderna o n aparat tlamà decoder che fej la traduzion dl signal. Cun la trasmiscion televisiva digitela giateran na miëur cualità tl udëi y audì, mplu saral mesun giapé de plu programs zënza paiamënt.
as
