Ufize dl Liber fundier a Tluses: duc i dac digitei
USP – Passa 43.000 parzeles te 15 chemuns cun passa 76.000 nserzions iel ntan i ultimi ani unì fat tl Ufize dl Liber fundier a Tluses. L assessëur Hans Berger à ncuei (16 juni) ufizialmënter stlut ju l’era di libri grosc a Tluses y nvià via l’era digitela. “A chësta maniera iel mesun ti ruvé permez plu riesc y cun manco burocrazia ala nfurmazions dl liber fundier, che ie sën nce plu avisa” à dit Berger.
Dan ot ani fovel cun Pruca unì scumencià a digitalisé i dac dl Liber fundier a Tluses. Urtijëi ie l’ena passeda stat l ultimo di 15 chemuns che à l liber fundier online. De ndut iel danterite unì metù 76.000 dac tl computer per i chemuns da Tluses a Gudon, Barbian, Feldthuns y Latzfons, Funes, Laion, S.Cristina y Sëlva.
Ala fin dl ultimo ann oven bele digitalisà 225 de 246 raions dl liber fundier. “N cont de parzeles ons ntant bele passa 80% tl computer” dij l assessëur Berger. L tëmp de crì ti gran libri ie passà, sën possen abiné la nfurmazions tres computer y les stampé.
Cun la digitalisazion dl Liber fundier abinen scialdi plu riesc la nfurmazions. I dac possa unì metui a desposizion dl’aministrazions publiches y i zitadins ne muessa nia jì da n ufize al auter cun documënc. Prufescionisć che adrova plu suvënz dac dl Liber fundier possa ënghe ruvé permez ala rë de dac. Al mumënt iel feter 8.000 ufizies che possa ruvé permez al sistem online.
as
