Lëures per Ciamaur a Al Plan mët man
USP – A Ciamaur, a Al Plan de Mareo, scumëncia i lëures per fé su berces de ruf che dëssa defënder l raion produtif da smueies. Te na segonda pert di lëures uniral fat mo d’autra berces acioche i ruves Foscedura y Ciamaur ne mëine nia material tl luech.
„I lëures vën fai sun la basa de n plann de raions n pericul, che ie unì lascià fé dal Chemun de Mareo per Al Plan“ spiega Rudolf Pollinger, diretëur dla Repartizion provinziela per costruzions che straverda dal’ega. Na pert de Al Plan ie manaceda dai ruves de Foscedura y Caimaur. L raion produtif y la plaza dal palé tl ridl Ciamaur ie tla pert plu periculëusa. Chësc raion dëssa śën unì straverda da na bercia. I lëures sun la pert a est dl raion produtif dëssa scumencé chisc dis. Chësta bercia dëssa tenì su de majera cuantiteies de material che possa unì menedes ju dal ruf y nscila les mëter ju tl bosch dessëura. „A chësta maniera ti vëniel tëut la forza de desdruzion al material menà dai ruves“ spiega l diretëur de repartizion. Per fé chësta berces vëniel fat n nvestimënt de 230.000 Euro. L proiet de Sandro Gius vëija ne dant mo d’autra berces per defënder l luech. L finanziamënt dla segonda pert dla berces se aspieten mo ntan chësc ann.
as
