Durnwalder presidënt dl’Arge-Alp: doi ressoluzions ti Grijons
USP – Doi ressoluzions, una sun la politica dl’energia y una sun l svilup de tecnologies nfurmatiches à i presidënc dla regions dla chemunanza de lëur di raions dl’Elpes Arge-Alp ncuei (19 juni) dat pro a Flem ti Grijons. Tla Svizra iel ncuei nce fineda via la presidënza di Grijons per la chemunanza che tol ite 23 milion de persones, la dajan inant ala Provinzia de Bulsan.
Dan sëurandé a Luis Durnwalder la presidënza dl’Arge-Alp iel a Flem pra la carantejima cunferënza unì dat ora doi ressoluzions. Te n studi iel unì analisà la funtanes de energia da se nuzé nce tl daunì che ie da abiné ti raions defrënc. L ie unì mustrà su ula che chësta energia possa unì adurveda y ula che l ie mo potenzial. Aldò di resultac dl studi ie i presidënc dla regions stai a una sun na ressoluzion per adurvé de plu chësta sort de energies, che vën dantaprima dal’ega, dal lën, dal surëdl y dla ciaut dla tiera. Te chësta ressoluzion se tratela nce de sparanië energia aldò de la sozietà „2000 Watt“, che à l fin de ruvé tl 2100 cun n cunsum de 2000 Watt per persona. N cont de mubilità iesen ti Grijons stai a una de smëndrì l mpaziamënt dl’aria y l disturb dl chiet da pert dl muvimënt ndividuel. Chësc dëssa unì arjont sustenian de cumpré mesuns de trasport che furnea plu achiet y che mpazieia manco l’aria, y sustenian n turism plu mujel. „Ti raions dl’Elpes messons nce se dé da fé che l trasport pesoch vënie spustà dala streda ala ferata y nia me sun d’autra trasses“ à sorissà Luis Durnwalder. Acioche chisc fins vënie nce arjonc dëssel unì sustenì l barat danter i raions dl’Elpes, scrit ora n pest per sparanië energia y na uneranza per hotiei efizienc tl adurvé energia.
Tla segonda ressoluzion se mpënia la regions dl’Arge-Alp de pité de bona cundizions per adurvé la tecnologies de nfurmazion y comunicazion, sciche na bona rë a banda lergia.
Te chëla che Luis Drunwalder ie deventà presidënt dl’Arge Alp al sorissà che la cumenanza à n daunì sce la miurea si prufil politich per vester portausc per l’Elpes tl’Europa. Te si prima rujeneda à Drunwalder rujenà de se prejenté deberieda a Brüssel, la ratificazion dl’acurdanza de Madrid per regulamenté la culaburazion sëura la sëides, de pruvedimënc per sustenì i raions da mont y smëndrì l transit.
as
