Mostra de Asami Kato tl Museum Ladin
USP – Opres dl artist Asami Kato dal Iapan saral da udëi dai 26 de juni inant tl Museum Ladin canche l unirà nce fat la giaurida dala sies da sëira. L titul dla mostra tl Ciastel de Tor ie „Asami Kato dal Iapan ala Ladinia“.
Te si opres d’ert à Asami Kato daniëura tëut ispirazion dala cuntredes de ziteies storiches coche Unieja o Firenze. Ti uedli dl artist ie perchël la Dolomites states daniëura mé n mond de parëies maiestëusc y n post da passé la feries ma nia n motif da tradujer te formes artistiches. Mpermò da canche l cunësc la Ladinia plu sot stajan ntan l’instà tai Tamersc, a Al Plan de Mareo, al metù man da ti cialé ala Dolomites cun n’auter uedl purvan a nterpreté artisticamënter la cuntredes y i paesajes de nosc luesc. Cun si sensibiltà iel nsci garatedes opres artistiches ispiredes ala Dolomites ma l ne mancia nia elemënc iapanesc a chëi che l artist ie inò ruvà a scuvrì do che l se ova dat ju dantaldut cun l’ert ozidentela.
La mostra ie unida metuda a jì sibes sota l patrozine dl Consolat Generel dl Iapan de Milan che dl Istitut iaponesc de Cultura de Roma. Duc can ie nviei a ti cialé la mostra y ala giaurida n vënderdi 26 de juni dala 18.00. La mostra resterà da udëi nchin ai 23 de agost, for da merdi a sada (10 ala 18) y de dumënia (14-18); de agost gëura la mostra tl Museum Ladin nce de lunesc (10-18), per nfurmazions possen cherdé su l 0474/524020.
as
